ثورة حتي النصر

ثورة حتي النصر

أه يا بلد فوتوشوب والقتل فيكي ديزاين

الحق اسمه خراب .. والثورجي خاين

لو حد بحقه طالب يقولوا عنه عنيف

والبلطجي لو هاجم بسلاحه يبقي شريف

اللي عالظلم ثائر بالميري يتحاكم

والظالم المجرم عايش .. وكأنه حاكم

الامن شايل ايده .. ويقول لك انفلات

ويقولوا لو بس تهدوا هانظبط الاقتصاد

عايزيننا بسرعة ننسي .. ونصالح الفساد

يعني المفروض نطاطي ونقبل بالهوان ؟

نقول دي ثورة كانت .. نرجع بقي لزمان ؟

دا اللي يبيع مصيره علشان رغيف العيش

مايستاهلش لقمه ولا حتي ليوم يعيش

اما الباشا اللي حاكم وفاكر إنه شديد

شال من دماغه خالص إن احنا شعب عنيد

والثورة لو حتي ضاعت فهي جابت جيل جديد

واهو زييه زي اللي قبله هانعمل له shift + delete 

مناوئة 3 : الفلول

مناوئة 2 : الايد الخفية

مناوئة 1 : الشرطة العسكري

التحريض والتعريض

العنوان ده مش عنوان لكتاب تاريخي أو في علوم اللغة انما ده الفكر اللي بيتبعه الاعلام الرسمي الممول من ثروات الشعب واللي مش بيخدم او بيعبر عن الشعب اللي بيموله. يظهر التحريض في إن التعريف النموذجي للمواطن بالنسبة للاعلام هو المواطن الهادي الراضي المستكين المؤمن بالاستقرار اللي بيلزم بيته مهما حصل وبالتالي كل من يخرج من التعريف السابق بيضعه الاعلام تحت طائلة التحريض وبيتم وصفه بصفات غريبة زي مخرب , عميل , موجه , مغرر به وغيرها من الصفات اللي اغلب الشعب يجهل معناها لكن معندوش مانع من ترديد بعضها كتعبير عن المتابعة.

لو خدنا عينة بسيطة اللي هي الكام شهر من بداية الثورة لحد دلوقتي هانلاقي إن ابشع ما في عملية التحريض هي الاعتماد علي ضعف ذاكرة المواطنين الموجهين من الاعلام يعني في يوم 25 يناير الاعلام صرح إن المظاهرات اللي حصلت ما هي إلا محاولة من جماعة الاخوان المسلمين مع إن الجماعة حلفت 100 يمين إنهم مالهمش دعوه باليوم وبعد كام يوم بعد جمعة الغضب وبداية الاعتصام في التحرير جي الدور علي المعتصمين إنهم ياخدوا نصيبهم من التحريض بوصفهم مخربين وعملاء وقابضين و تحول بقدرة قادر الشباب بتوع 25 يناير اللي كان من كام يوم بيزعزع الاستقرار إلي شباب محترم ومستنير وواعي.

مرت الايام وتنحي مبارك لكن البعض استمر في المطالبة بالتغيير والتخلص من القيادات الفاسدة علشان ييجي الدور عليهم في التحريض ويتحول وبقدرة قادر برضه الشباب اللي كان معتصم واللي كان بيعمل علاقات مش عارف ايه كاملة وبياكل كنتاكي وبياخد تمويل من بره إلي شباب طاهر شريف وطني سعي بإخلاص للتغيير.

وتمر الايام وتيجي موقعة العباسية بعد خروج شباب في مسيرة سلمية للتعبير عن الغضب من سوء الادارة وبالتالي ياخدوا نصيبهم من التحريض من قبل ما تطلع المسيرة وإنهم طالعين في المسيرة ومعاهم سلاح حتي إن الاعلام الشخصي للمجلس العسكري طلع بيان بإن حركة 6 ابريل ممولة من برة ومعاه الدليل ولحد النهاردة لا شفنا دليل ولا تمويل .. أه نسيت الاعلام برضه وصف الشباب اللي بينزل مظاهرات بإنه واعي وبيتظاهر سلمياً وإنه فاهم الديموقراطية.

اللي يضحك في المهزلة دي كلها إن الشباب بتوع 25 يناير هم اللي كانوا معتصمين وهم اللي نزلوا يطالبوا بالاصلاح وهم اللي طلعوا المسيرة اما اللي يحزن إن برغم سذاجة الاعلام وكذبه المستمر إلا إن في ناس بتصدقه لحد دلوقتي.

عش الصراصير

يحكي أن اسرة عايشة في بيت وكل شوية كانوا بيشوفوا صراصير , مرة يشوفوا صرصار بيجري علي السرير مرة في المطبخ مرة في الحمام وفي يوم قرر أحد افراد الاسرة إنه يتخلص من القرف ده فجاب مبيد حشري ورشه في الاماكن اللي شاف فيها صراصير فلما رش المبيد لقي صراصير كتير ميته وصراصير كتير جداً بتجري في كل حتة .. صراصير أكتر من اللي كان شايفها واللي كان فاكر إنه بمجرد ما يقتل كام واحد يبقي قضي عليها كلها واكتشف إن الشقة فيها عشش كتير للصراصير فقرر بناءاً علي الوضع الجديد إنه يلف ويدور علي الصراصير ويدمر عششها كلها.

لكن باقي افراد الاسرة كانوا منزعجين من الصراصير اللي بقت في كل حتة وقالوا له انت السبب في اللي احنا فيه وانت اللي زودت الصراصير في البيت لحد ما خربته , سيبهم هم هايرجعوا عششهم و لو شفنا صرصار تاني نبقي نقتله لكن كدة كفاية احنا مش عارفين نعيش من الصراصير دي والمبيد اللي ريحته تقرف وقرروا عدم المشاركة في التنظيف ... وحتي الآن محدش عارف هل هايعيشوا فعلاً مع الصراصير ولا ممكن بمرور الوقت يختاروا التطهير

ملاحظات عامة :

1-    الصراصير كانت موجودة اصلاً في الشقة مش المبيد هو اللي جابها.

2-    طول ما عشش الصراصير موجودة هايفضلوا يطلعوا من حين لآخر.

3-    لو الناس دي عايزة تعيش في نظافة حقيقية يبقي لازم تقضي علي عشش الصرصير.

4-    صحيح المبيد ريحته وحشة لكن لو استحملوه شوية هايعيشوا في نظافة بجد.

من مذكراتي .. حدث في المترو

الموقف ده حصل لي من حوالي سنة ونص وأنا بحب النوت دي جداً لأنها أول نوت ساخرة اكتبها وبدون قصد وكنت كتبتها لمنتدي يوني مصر في موضوع كان كل واحد بيتكلم عن موقف كوميدي حصل له .. قصر الكلام النوت اهي

____________________________________

امبارح اللي هو كان الخميس ركبت المترو -وليعاذ بالله- الساعة 6 متوجها اللي المعصرة علشان ازور احد اقاربي العائدين من السفر. اول ما ركبت من محطة فيصل لقيت المترو زحمة جدا وفهمت من الركاب ان القطر ده جي متأخر قلت في قرارة نفسي طيب ده في ناس كتير بتركب من الجامعة والبحوث هايقفوا فين؟؟

طبعا ده سؤال ناتج من اني مبركبش المترو في اوقات الذروة يعني كنت متخيل ومتصور ان الزحمة ان يكون اللي جنبك بيخبط فيك طول ما المترو ماشي لكن لما وصلنا محطة الجامعة والناس ركبت المسافة دي صغرت وبقي اللي جنبك لازق فيك .دخلنا محطة البحوث قلت اكيد محدش هايركب لكن برضه ركبوا وبدل ما الناس كانت لازقه في بعضها .......الناس بقت كتلة واحد خالية من المسام لدرجة اني تقريبا كنت انا وواحد جنبي بقينا لابسين نفس الجاكيت مع اللي ورانا 

جت محطة الدقي والاوبرا ومحدش قدر يركب فعلا خلاص مبقاش في مكان لنملة مش بني ادم .وجائت المعركة الكبري في محطة الشهيد انور السادات .تخيلوا ان كل الزحمة اللي بحكي عنها والتلاتة اللي في جاكيت واحد المفروض ينزلوا والله اعلم المفروض زيهم او اكتر منهم يركبوا .فتح الباب وبدأت الجحافل في النزول...... قال وانا عملت ناصح قلت خليني ورا علشان قال ايه اللي قدام يزقوا وانا انزل باشا .الخطة كانت ماشية تمام الناس اللي قدامي بتزق الناس اللي علي المحطة وانا عمال اقرب من الباب....اقرب من الباب.....اقرب من الباب .وفجأة وبحركة ديناميكية مخادعة لئيمة قدر قوم المحطة انهم يتدفقوا من يمين وشمال قوم القطر ولقيت اللي قدامي بيرجع طبعا مش بمزاجه ده بقوة الدفع اللي وصلت انها خلتني ارجع لحد الباب التاني اللي مقفول واقعدت اقول لهم... ياناس ....انا نازل هنا...... نزلوني..... دي المحطة اللي انا عايزها ردوا بكل هدوء خلاص انزل رمسيس وغير من هناك

وفعلا مبقاش قدامي خيار تاني وطبعا خلال المحطتين محمد نجيب والعتبة كنت بحارب علشان ابقي قريب من الباب لاني مكنتش مستعد اروح شبرا واغير من هناك

ربنا يجعلها آخر الاحزاب

بعد ما اتصدم الشعب المصري بالبيان اللي وقع عليه 13 حزب لما يحتويه علي كم هائل من التنازلات كتر الكلام علي اللي حصل في الإجتماع مع ائتلاف الاحزاب وانتشر أكثر من سيناريو

السيناريو الأول

الائتلاف : احنا عايزين مطالب الثورة ولازم السلطة تتنقل في اسرع وقت

المجلس : هانعدل لكم المادة 5 في قانون الانتخابات بس الانتخابات تخلص علي مارس وربنا يسهل                    في موضوع انتخابات الرئاسة

الائتلاف : ايوة بس ده دم شهداء وانت مايرضيكش يتقال إننا بعنا دم الشهيد بالرخيص

المجلس : احنا هانمنع بتوع الحزب الوطني من دخول الانتخابات علشان خاطر دم الشهداء

الائتلاف : ايوة بس مينفعش نعمل انتخابات في طوارئ

المجلس : طيب احنا هاندرس موضوع الطوارئ بس احنا ممكن نسمح للرقابة الشعبية والدولية وبكدة نبقي كلنا ضامنين ميحصلش تزوير

الائتلاف : ايوة بس ....

المجلس : كدة حلو قوي

الائتلاف : طالما ده هايجيب حق الشهيد ويحقق اهداف الثورة يبقي اكيد موافقين

المجلس : تمام قوي .. الشاي بالياسمين يا عسكري

السيناريو التاني

الائتلاف يقرأ الوثيقة ويقول بغضب : مستحيل .. ايه الكلام الفاضي ده .. دي خيانة .. احنا مستحيل نعمل كدة

المجلس : طيب نشرب حاجة بعدين نتكلم

المشاريب تنزل عبارة عن مشروب أصفر

الائتلاف : ايه ده ؟

المجلس : ده شويبس جولد اناناس .. اشربوا ماتخافوش .. اشربوا

الائتلاف : ياه ده طعمه غريب .. انا حاسس إن الدنيا بتلف بي .. انا عايز انام

يستيقظ الائتلاف ويلاقوا المجلس العسكري قاعد بيشرب سيجارة

الائتلاف : انت عملت في ايه يا متوحش ؟

المجلس (يضحك ويقول) : مش قلت لكم هاخد منكم اللي انا عايزه سواء بمزاجكم او غصب عنكم

الائتلاف (يبص علي الوثيقة) : منك لله يا مفتري .. ضيعتني .. ضيعتني

السيناريو الثالث

الائتلاف يدخل غرفة الاجتماع وتم غلق الباب وبعد مدة يخرج

الائتلاف: البلد دي هي البلد الوحيدة اللي تقدر تاخد فيها حقك .. احنا خدنا فيها .. انت خدت فيها ؟ كلنا لازم ناخد فيها

بالرغم من ال 3 سيناريوهات إلا إن النهاية واحدة