بعد أن كان الطلبة يعاملوا معاملة العيال في الجزء الاول قام هؤلاء العيال بالإعتراض لتغيير الإدارة في المدرسة وبالفعل تم التغيير واصبح للمدرسة مدير جديد ووكيل جديد وطلبة اصحاب فكر جديد ولكن ..
الوكيل : إلحق يا فندم
المدير : خير في حاجة ؟!
الوكيل : الطلبة عاملين مشاكل ومعترضين علي ميس فاطمة الاخصائية الاجتماعية اللي بتدرس لهم إنجليزي لحد ما نجيب مدرس إنجليزي
المدير : ايه ده ؟ هو احنا هانجيب مدرس إنجليزي ؟
الوكيل : لأ طبعاً يا فندم احنا بنقول كدة والطلبة بينسوا مع الايام بس المرة دي مش راضيين ينسوا
المدير : اه .. طب بص قول إن نظراً لإزدحام الفصول إحنا هاناخد الملعب ونبني فيه مبني جديد
الوكيل : ايه ده يا فندم ؟ هو احنا هانبني مبني جديد ؟!
المدير : لأ
الوكيل : امال ايه ؟
المدير يغمز للوكيل فيفهم الوكيل المقصود من كلام المدير ويذهب لإعلان القرار ثم يعود للمدير
الوكيل : يا فندم الطلبة عاملين مشاكل ورافضين فكرة المبني اللي هايتبني مكان الملعب
المدير : طب سيبهم اسبوعين بعدين نبقي نكلمهم
وبعد مرور اسبوعين يقف المدير في طابور الصباح ويتحدث في الإذاعة المدرسية قائلاً
المدير : يا اولادي احنا لما قررنا نبني مبني اضافي كان هدفنا إننا نقلل الزحمة في الفصول ولأن امكانياتنا محدودة فمكنش عندنا حل غير إننا نبنيه في الحوش. بس بم إنكم رافضين الفكرة دي فاحنا خلاص هانلغيها علشانكم وتحقيقاً لمطالبكم وربنا يعوض علينا في الفلوس اللي كنا دفعناها للشركة اللي كات هاتعمل المبني
تعم البهجة ارجاء الطابور ويذهب الطلبة وهم سعداء بما حققوه بعد ضغط استمر اسبوعين ويذهب المدير ليخصم من ميزانية المدرسة الفلوس اللي "قال" إنه دفعها لشركة المقاولات وتظل ميس فاطمة مدرسة إنجليزي حتي وقتنا هذا
ليست هناك تعليقات:
إرسال تعليق