انا قلبي ورادي ليلية

من قبل ما استلم الشغل وانا اسمع عن حاجة اسمها وردية الليل بس مكنتش متصورها بوضوح لحد ما جي ليوم اللي اشتغل من الساعة 10 بالليل لحد 8 الصبح في وردية تُعَد من احد الظواهر الكونية المدمرة لصحة الانسان وبرغم استعدادي النفسي للمرور بالتجربة الا ان استعدادي ده لم ينقذني من الانهيار بعد مرور 6 ساعات فقط يعني قبل ما الوردية تخلص ب 4 ساعات. بعد مرور ال 6 ساعات الاولي في الوردية تحولت فجأة الي كائن صاحي نايم يعني بمعني علمي نايم اكلينيكياً بتحرك ولكن بعقلي اللاواعي وبالتالي كانت تجربة لطيفة لحالة النوم يقظاً. تكمن المشكلة في هذه الحالة اني شغال علي خط انتاج يعني مفيش حاجة اسمها نوم والا المصنع هايطلع منتج غير اللي المفروض يطلعه ومن عادات وتقاليد الصناعة اللي انا شغال فيها ان يحصل توقف من حين لآخر في الخط نتيجة لمشكلة ما مما يفرض علي جموع مهندسي الانتاج –اللي انا منهم- الاسراع للخط لمعرفة المشكلة والاشراف علي العمال اثناء اعادة التشغيل.

وفعلاً اثناء نومي ضربت سارينة لتعلن عن توقف الخط ولقيت نفسي –ولا حول ولا قوة الا بالله- بقوم من النوم وبجري صحيح مكنتش فاهم انا بجري علي ايه وبجري ليه بس كنت بجري وبالتالي كانت حالة من الجري بدافع غامض نحو المجهول واللي بنلاقي فيه صعوبة اننا نتعرف علي لحظة التوقف عن الجري لاننا من الاول منعرفش سبب الجري والموقف ده فكرني بايام اللجان الشعبية لما كان طفل صغير ييجي ويقول لنا انا "في بلطجية جايين من الناحية دي" نقوم رايحين نجري في الاتجاه المحدد بواسطة الطفل يعني عيل واحنا كلنا عارفين اللي يمشي ورا كلام العيال بيحصل له ايه وفعلا مكناش بنعرف نقف امتي لاننا بنجري ورا المجهول واللي كان بيوقفنا ان نفس العيل يقول لنا "لا دول جايين من الناحية دي" وبرضه كنا بنسمع كلامه وهو في الآخر يطلع انه متراهن مع اصحابه علي انه يشتغلنا المهم بعد الجري نائماً نحو المجهول توقفت عن الجري بفضل توجيهات ولاد الحلال من الزملاء اللي شغالين معايا اللي تحملوا اليوم ده كمية سخافات صدرت مني بسبب وصولي لمرحلة اللاوعي. بعد مرور وقت طويل بس بزمن قصير سمعت آذان الفجر واللي كان بالنسبة لي فرصة للخروج من صالة الانتاج للراحة والنوم ولو للحظات بس المشكلة بتظهر اثناء الصلاة وبالتحديد في مرحلة السجود .. الواحد بينزل ومبيطلعش الا برضه بفضل توجيهات ولاد الحلال من الزملاء.

 بعد الصلاة رجعت تاني للانتاج في حالة متطورة من اللاوعي المصحوبة بانعدام الرؤية وظهور ملحوظ لخلل في الادراك لدرجة ان ولاد الحلال لحقوني اكتر من مرة قبل ما افتح فرن درجة حرارته 250 مئوي محاولاً دخوله لسبب غير معلوم حتي الآن. ويتجلي وصولي لقمة اللاوعي لما المهندس المسئول عن تدريبي واللي بقالي اسبوعين بقابله كل يوم يسألني علي حاجة فابص له واقول "هو حضرتك معانا هنا في الشركة ؟" وتستمر المهاترات والتصرفات العجيبة في الصدور مني لحد ما ييجي اتوبيس الرحيل واللي انتظرته كتير وانتظره ولاد الحلال اللي معايا اكتر مني علشان يخلصوا بقي. وفي اللحظة دي بستدعي ما تبقي عندي من طاقة علشان اقدر اروح بيتنا واوصل بسلام لسريري العزيز واللي من فرحتي ببقي نفسي انام عليه في كل الاتجاهات بالطول وبالعرض وعلي جنبي وعلي ظهري وعلي دماغي للتعبير عن سعادتي بيه. وبعد استخدام السرير لعمل شحن للجثة الهامدة وللتخلص من آثار ليلة عصيبة قمت واستعديت لتاني يوم وردية ليل متسائلاً يا تري هأقدر انجو النهاردة كمان ويا تري ولاد الحلال من الزملاء هايلحقوني ولا خلاص .. هادخل الفرن ؟

احنا آسفين يا شم النسيم

في كل سنة وتعبيراً عن احتفالنا بعيد شم النسيم -اللي محدش عارف هو عبارة عن ايه- علي غرار لبس العيد بيشتري كتير من الناس حاجة غريبة كدة اسمها "فسيخ" ولو بحثنا عن كينونة الفسيخ هانلاقي انه محاط باسئلة كتير جداً اولها .. يعني ايه فسيخ ؟ من وحي ثقافة اللغة المصرية الشعبية هانلاقي لما واحد يرجع من شغله تعبان ومش شايف قدامه ومحتاج يستحمي لان ريحة العرق وريحة رجليه واصلين لسابع جار فبيترمي علي السرير وينام زي "الفسيخة" فيا تري مين اللي اخد الاسم من التاني ؟ وهل الفسيخ في تشابه بينه وبين الراجل العرقان ابو ريحة رجل معفنة ؟ وهل انا عادي آكل الفسيخ ده بعد معرفتي بالعلاقة ؟

تاني سؤال عن كينونة الفسيخ بتدور حول تكوينه. الفسيخ هو نوع معين من السمك بيتحط في بيئة من الملح المبالغ فيه وبتوصل وحشية البشر في انهم بيحشوا السمكة دي بالملح مما يضع احتمال وفاة السمكة باسفسكيا الاختناق .. وتفضل السمكة في العذاب الرهيب ده فترة طويلة وكل ما بتزيد مدة التعذيب بتزيد جودة الفسيخ ويصبح اكثر "فسخنة" وبعد كدة بالهنا والشفا وانا لله وانا اليه راجعون. الغريب ان في ناس مش بتقتنع ان ريحة الفسيخ رهيبة فتضيف ليها نكهة البصل علشان يبقي فعلا موت وخراب ديار.

اغرب ما قضية الفسيخ ان كل سنة يطلع الاطباء في التليفزيون يحذروا من اضرار الفسيخ والحكومة تعلن عن ضبطها مش عارف كام طن فسيخ فاسد -ده علي اساس ان في فسيخ مش فاسد- وبالرغم من كل الدعايا السلبية دي الا ان محبي الفسيخ مش بيتأثروا وبيستمروا في تناول فسيخهم وايماناً من محبي الفسيخ بالمشاركة مع المجتمع فالفسيخ ده لازم يتم تناوله في الخلاء مع رفقة انصار الفسيخ وبالتالي بتنتشر رائحة الفسيخ في هواء المدن ليتحول من شم النسيم الي شم الفسيخ. لكن المشكلة الاكبر ان الانصار بيروحوا في اماكن عامة حيث يتواجد بعض المعارضين مطلقين دفعة من الهواء الصادرة من اعماق المعدة في انفاس المعارضين مما يسبب حالات مختلفة من الترجيع او الاغماء او الهلع علي اقل تقدير .. ومن هذا المنطلق اطالب بفصل المؤيدين عن المعارضين علشان ميحصلش موقعة الفسيخ ويطلع ناس يقولوا احنا آسفين يا فسيخ.

عزيزي النحنوح .. كفاية نحنحة

لما نبص بسرعة كدة علي نجوم الغناء في الوطن العربي هانلاقي ان كل النجوم دول بيغنوا في قطاع واحد من الحياة وهو الحب وكمان واخدين قطاع من القطاع الواحد ده اللي هو حب بين اتنين (واحد وواحدة لمنع سوء الفهم) ومتمسكين بيه جداً لدرجة اننا بنلاقي واحد بقاله 20 سنة بيغني عن الحب وبالتالي تطرق لكل فتفوته عنه واستهلكه استهلاك مبالغ فيه. طيب ده واحد ما بالكم بقي بجيش من المغنيين اللي ماسكين القطاع ده ولا كأنهم انبوبة بوتاجاز في زمن بقي من النادر الحصول علي انبوبة.

لو رجعنا للراجل اللي بيغني بقاله 20 سنة للحب بين اتنين ووقفنا نفكر كدة هانلاقي انه عمل حوالي 20 البوم كل البوم فيه متوسط 8 اغاني يعني حوالي 160 اغنية (ده غير السنجل والحفلات) مما يدل ان المغني ده نحنوح كبير لدرجة انه يقضي 20 سنة من عمره يغني للحب ويلخص مشوار حياته انه اضاف للمجتمع 160 اغنية حب. بس المشكلة اللي بتظهر في هذه الملحمة النحنوحية هي نفاذ كمية الكلمات الرومانسية ما هو واحد غني 160 اغنية اكيد خلص كل قضايا الحب .. دا انا مستعد اخلص كل كلمات الحب في 12 اغنية و اسم البوم. وبالنظر بموضوعية ومحاولة لادراك القضايا اللي ممكن يتم غنائها عن الحب هانلاقي مثلا في واحد لسة عارف واحدة وعايز يشقطها ومش عارف وواحد خلاص اتعرف علي واحدة وبيوصفها علشان بيثبتها وواحد بقاله كتير ماشفش حبيبته فبيغني عن مدي انها وحشته وواحد اتعرف علي جزمة خانته او كانت قليلة الاصل او باعته علشان مقدرش يجيب لها نيش ومروحة سقف توشيبا (طبعاً ده مش هايتقال في الاغنية بس هو ده السبب الحقيقي) يعني ممكن نلخص الحب بين نقطتين هما الانسجام والندالة وهنا نطرح سؤال مهم هل الانسجام والندالة في الحب يستاهلوا 160 اغنية ؟

النوعية دي من المغنيين لما بيحاولوا يضيفوا لل 160 اغنية حب اغنية ولا اتنين عن الوطنية وعن مصر بتظهر وبشدة النزعة النحنوحية وده شوفناه بوضوح في الثورة لما كان الاعتماد في الحماس علي حاجة من الاتنين اما الاغاني القديمة زي سيد درويش والشيخ امام او المغنيين الشعبيين (underground) والناس دي فعلاً قدمت اغاني تخليك واقف قدام عدوك صلب اسد لا يهزك سلاحه ولا عنفه يعني لما تلاقي قنابل مسيلة للدموع بتترمي عليك وتتخنق منها تفتكر "قوم يا مصري مصر دايماً بتناديلك" ولما تلاقي واحد بينزف قدامك تفتكر "انزف ابكي اموت وتعيشي يا ضحكة مصر" ولما تسمع ضرب نار تفتكر "اموت يا صاحبي وقوم خد مكاني دي بلدنا حالفة ما تعيش غير حرة" لكن اللي اكيد مش هايحصل انك تبقي داخل علي عدوك وانت بتقول "مشربتش من نيلها طب جربت تغنيلها" الا اذا كنت عايز تموته من الضحك.

طيب بالنسبة لواحد فاضي يعني مش خاطب ولا متجوز ولا مصاحب ولا ليه اي علاقة بالجنس الآخر الا من خلال الزمالة والعمل يعني بعيد تماماً عن دائرة تأثير ال 160 اغنية. هذا الشخص لما يحب يسمع اغنية يعمل ايه ؟ اللي محتاجه فعلا الشخص ده انه يسمع حاجة تحمسه في مشوار حياته او اغنيه تدعوه انه يحلم ويسعي لتحقيق الحلم او اغنية يتعرف بيها علي نفسه وتصارحه بعيوبه او اغنية تخليه يواجه مخاوفه .. يعني من الآخر محتاج يسمع اي حاجة الا ال 160 اغنية وبنظرة واقعية لازم نعرف انه ما دام في مغني غني 160 للحب في حين ان الحب ده جزء صغير من حياتنا وعلاقاتنا يبقي في المقابل لازم يبقي في آلاف الاغاني عن الاجزاء التانية ومن نفس المطرب والا يبقي احنا بنبوظ دماغنا وبنغيب عقلنا وبنحصر تفكيرنا في جانب وننسي باقي الجوانب مما يحولنا في النهاية الي حفنة من النحانيح.

حزب الكنبة ... اصل الدراما

انضم الآن لحزبنا الاكثر شعبية ... حزب الكنبة. انه الحزب الذي نشأ منذ سنوات لا يهم ان تعرف عددها. الحزب الملقب بالاغلبية الصامته فاصمت وكن مع الاغلبية. خطتنا بعد الثورة هي نفسها قبل الثورة ولو انطبقت السما علي الارض ستظل خطتنا كما هي. الانضمام للحزب لا يحتاج سوي الايمان والعمل بالمباديء العامة للحزب

مبادئنا

1-    الانتخة هي السبيل الامثل لاصلاح البلاد.

2-    عدم وجود سقف للمطالب وذلك لانعدام وجود مطالب.

3-    اعداء الوطن هم النشطاء لان بتحركهم النشيط بيخربوا البلد.

4-    الوعي السياسي مصدره قناة روتانا سينما وحلقات ميلودي وخصوصا اللي بتظهر فيها بوبي.

5-    المشاركة السياسية تتم فقط في ايام التصويت او الانتخابات.

6-    ممثلنا في مجلس الشعب هو ابن منطقتنا اللي هايوفر لينا فرنة اكبر ويزود عدد الميكروباصات اللي شغالة علي الخط.

7-    اهدافنا في الحياة اكل كتير والنوم لفترات طويلة وفرفشة يوم الخميس.

8-    نكره الليبرالية والاشتراكية والعلمانية و الرأسمالية ... ونجهل الاسباب.

9-    نكره البرادعي لان دمه تقيل علي قلبنا وصوته رفيع واقرع ولابس نظارة باغ مدوره.

10- سلاحنا ضد من يظلمنا .... الدعاااااااااء.

11- الثائر الحق هو من ينام طويلا ثم ينتفض ليتناول فطوره.

مكاننا في كل مكان في كل بيت قدام كل شاشة تليفزيون جنب اي قرطاس لب او ترمس. اعضاءنا منتشرين بزيهم الرسمي البيجامة والشبشب في الشتاء والفانلة الحمالة وبنطلون البيجامة في الصيف. انضم لينا وانت الكسبان هاتريح بالك من وجع الدماغ ووعيك يزيد. قوم يا مصري بلدك محتاجة ليك قوم خليك ايجابي وأنتخ في البيت.

شعارنا : نوم عبودية سياسة مهلبية

نجحت العملية والمريض مات

غريبة قوي الناس اللي لسة بتدعو لمظاهرات لحد دلوقتي هو مش خلاص بقي الثورة نجحت واحنا لازم نختار بين الاستقرار والفوضي زي ما دلنا شيخ الأمه حسني مبارك ولازم عجلة الانتاج ترجع تدور ولازم فلول النظام البائد اللي بيقودوا ثورة مضادة ... مش عارف هو ايه اللي لازم في الحتة دي لاني مش فاهمها بس هو لازم برضه علشان البلد متخربش. كل شوية يقولوا مليونية مليونية هم الناس دي موراهاش حاجة غير المظاهرات وسياسة البلد؟ ايه مش بيروحوا شغل مش المفروض كل واحد يروح شغله ويرجع يتفرج علي التليفزيون وينام بدري علشان يلحق يصحي يروح شغله تاني ولما ييجي وقت الانتخابات زي "انتخابات الاستفتاء" ينزل ويروح يقول رأيه اللي هو كونه من خلال نومه بشكل كافي يخليه قادر علي الادلاء بصوته بقوة.

واكتر حاجة مضايقاني المطالب الفئوية ... كل شوية عمال في مصنع ولا طلاب جامعة ولا عاملين في جريدة ولا قناة يعملوا اعتصام علشان ليهم مطالب فئوية حقيره وبرغم نجاح الثورة الا انهم لسة ليهم مطالب. واحد وشارك في الثورة علشان لقمة عيشه وعلشان عايز مرتب احسن يعيشه عيشة كريمة ... ليه يعمل مظاهرة بعد نجاح الثورة لرفع مرتبه ؟ واحد شارك في الثورة علشان حقه في التعبير والاعتصام ... ليه يعمل مظاهرة بعد النجاح الرهيب للثورة علشان يلغي قانون منع الاضرابات ؟ واحد شارك في الثورة علشان مديره في الشغل راجل فاسد وخارب المؤسسة اللي شغال فيها ... ليه يعمل مظاهرة بعد التطهير الثوري علشان يشيل المدير ده ؟ واحد شارك في الثورة علشان المجالس المحلية مليانة فساد ومش بتعمل حاجة مفيدة ... ليه يعمل مظاهرة بعد التغيير الثوري لهيكل البلد علشان يحل المجالس دي ؟ ليه الناس دي عندها طلبات تاني بعد نجاح الثورة ولا هو استغلال وتخريب للبلد !؟

وفقاً لمدرسة القذافي في علوم اللغة اسمحولي اوضح ليكم معني كلمة "فئوي" الكلمة دي مكونة من مقطعين "فوق" و "أوي" وبالتالي الكلمة كانت عبارة عن "فوق أوي" وبعد اضغام القاف مع الهمزة وحذف الواو الاولي للتخفيف بقت "فئوي" يعني الوصف ده معناه ان مطالب الناس دي "فوق أوي" ومش مقبولة وكمان غير منطقية زي ما وضحت في الفقرة اللي فاتت.

الاستمرار في المطالبة بالحقوق بيعطل البلد ويخربها وكفاية ان الشرطة لحد دلوقتي واخدة علي خاطرها ومش عارفة تنزل الشارع تأثراً بالهجوم العنيف اللي تعرضوا ليه يوم 28 من الشعب المصري المسلح بالايمان هو صحيح الشرطة العسكرية قايمة بالواجب وزيادة بس برضه احنا اتعودنا علي الضرب من الشرطة. وعجلة الانتاج مش عارفة تمشي هو انا صحيح مش عارف هي مش عايزة تمشي ليه بس هي برضه مش عايزة تمشي بسبب المطالب الفئوية. حتي المنتخب المصري خسر من جنوب افريقيا ومش هايروح كاس الامم بسبب المطالب الفئوية واسرائيل ضربت فلسطين بسبب انشغال مصر بالمطالب الفئوية هو صحيح اسرائيل دايماً بتضرب في فلسطين بس المرة دي بالذات كان السبب فيها المطالب الفئوية. وانا كمواطن مصري بحب الاستقرار وبكره الفوضي بناشد شبابنا انه ميمشيش ورا الناس اللي بتخرب البلد هو صحيح الناس دي وشبابنا هم اللي عملوا الثورة بس كفاية كدة وخلونا نتفق ان يكون شعارنا الفترة اللي جاية "انا احب الاستقرار .. مش فوضي وشغل هزار" ولازم نضحي بالام والجنين والاب علشان الزحمة تخف.

ليه هاقول لا ؟

من اجمل نتايج الثورة هي ان كل حوارات الناس بقت حوالين السياسة حتي الشباب اللي كان بيقف علي الناصية يضرب سيجارتين ويتكلم عن البنات بقي يقف يتكلم عن السياسة مع الحفاظ علي عادة ضرب السيجارتين. خلاص فاضل كام يوم علي التصويت علي التعديلات الدستورية والحاجة اللي عاجباني في التصويت ده هو ان الناس فعلا بتدور علي الدستور وتقرأه وعرفنا ان في حاجة اسمها دستور 1954 ودستور 1971 و الاجمل ان الاستفتاء مش عارفين نتيجته لحد دلوقتي وده شيء بالرغم من انه منطقي وبديهي جداً الا انه امر مستحدث علي بلدنا الحبيبة اللي بقالها زمن النتايج فيها بتتراوح ما بين 99% و 99.9% حسب الظروف السياسية او تقريباً حسب ميول اللي بيطلع النتيجة بحيث ان في ناس مش بتحب تكتب كسور فبالتالي كانوا بيفضلوا ال 99 عن 99.9 لتتجلي ابهي مظاهر الديموقراطية في اختيار المعلن عن النتيجة اي رقم يفضل. الاستفتاء المرة دي ممكن تبقي نتيجته نعم وممكن تكون نتيجته لا وبم اننا عايشين حالة جديدة من الديموقراطية فأنا اقدر وبدون خوف اني اصرح بنيتي في التصويت بأني هاقول لا.

طب ليه هاقول لا؟ طبعا مش مجاراة لفكر التغيير أوالتعبير عن الملل من كلمة "نعم" لكن للاسباب الآتية

اولا : الاستفتاء مش بس علي التعديلات لكن علي الدستور القديم كله واللي اظن ان بعيداً عن الكلام المجعلص اللي بيقول ان "الدستور سقط بشرعية الثورة" لكن انا احب اقول انه اتنفخ واتفرتك بقرارات المجلس العسكري من يوم ما الرئيس سلم لهم الحكم اللي هو كان اصلا قرار غير دستوري يبقي ازاي ارجع دستور اللي عمله فرتكه واحنا فرتكناه قبله ده غير انه قعد يفصل ويقيف ويلعب فيه ولا لعب ابو تريكة في دفاع الزمالك علشان يفضل مسيطر علي البلد.

ثانياً : واضح من اسلوب القوات المسلحة انها بتحب تعمل مفاجأة للشعب يعني مش بيقولوا ايه اللي هايحصل بعد رفضنا للاختيار اللي بيطرحوه علينا. حتي الآن محدش قال لنا ايه اللي هايحصل لو قلنا "لا" لكن في تكهنات منتشرة في البلد سواء من فقهاء دستوريين او من حزب الفتي بالهجايص ولسة الناس بتدور هايحصل ايه مما يذكرنا ببحث المصريين عن غطا الكازوزة اللي عليه الجادون.

ثالثاً : لسة لعبة الاختيار بين الاستقرار والفوضي بتتلعب للمرة الثالثة علي التوالي في أقل من شهرين والغريب ان الناس لسه بتصدقها تطبيقاً لنكتة الصعيدي اللي اخد 30 قفا علي سهوة وانا مش عارف هل في علاقة بين ال 30 دي وال 30 بتاعة مبارك اللي طلع بيها تلاتيننا. قال لك مبارك لو مشي هاتبقي فوضي سيبوه ال 6 شهور دول الدنيا مش هاتطير وبعد ما مبارك مشي شوفنا بلاوي ولا كان هايظهر ربعها لو فضل مبارك. قال لك مين البديل عن شفيق ده راجل كويس وسيبوه يشتغل بلاش افترا وبعدين جبنا رئيس وزراء محترم جداً بيعرف يرد علي الاسئلة مش كل ما تسأله يقول لك "مش عارف" و "ده رأيي" وشغل المطيباتية ده. اظن انه بالمثل لو طبقنا نفس القاعدة هانلاقي ان القوات المسلحة لسة عندها اختيار افضل واوقع وتم عرضه بالفعل اللي هو عمل دستور جديد.

رابعاً : مش عارف اقنع نفسي اني اتحكم بدستور ديكتاتورية مصر الشعبية المهلبية لحد ما الرئيس والمجلس اللي هانجيبهم وفقاً لدستور المهلبية يعملوا دستور جديد قد يكون اكثر مهلبية وده ردي علي اللي بيقولوا كدة كدة الدستور هايتغير ليه بقي القلق خلوا البلد تمشي وانا بصراحة مش عارف هم عايزينها تمشي تروح فين؟

خامساً : رفضي لنظرية الرضا اللي بتتطبق بشكل استسلامي جداً ولحد دلوقتي لسة في ناس بتقول احمد ربنا والحس ايدك صباع صباع ان كل ده بيتعمل وكأننا خايفين نعيش احسن ونبقي محترمين اكتر معرفش هل ده انعدام طموح ولا عدم ثقة في القدرة علي التغيير ولا خوفاً من الغاء مسلسل غادة عبد الرازق في رمضان القادم.

سادساً : عدم خوفي بشكل هيستيري علي المادة الثانية زي ما ناس كتير بتقول ان العلمانيين والمسيحيين هايطلعوا من ورا الدولاب بالليل واحنا نايمين و يعملوا دستور جديد علشان يلغوا المادة الثانية. طيب ما هو سواء غيرنا الدستور دلوقتي او بعد الانتخابات البرلمانية والرئاسية الوضع هايفضل هو هو ولا هو العلمانيين والمسيحيين ناويين يسافروا آخر الشهر؟

سابعاً : مخالفة اللي احنا بنعمله لفكرة الدستور اصلا. الدستور ده عدم اللامؤاخذة هو الاعراف اللي بيتفق عليها الشعب علشان لما ييجي ريس او اي حد في منصب يبقي عارف حدوده و احنا نعرف نحاسبه علي اساس ايه. لكن اللي احنا هانعمله هو اننا نجيب الريس ونوزع المناصب وبعد كدة نعمل دستور ... ده طبعاً لاعتباري ان الدستور الحالي غير موجود للاسباب المذكورة في اولاً

وبناء عليه قررت اني انزل يوم السبت 19/3/2011 علشان اخوض اول تجربة لي في المشاركة في تغيير البلد للاحسن و بغض النظر عن وجهة نظري بأني هاقول لا فاللي هايقول "نعم" مش هاطلع ---- ولا حاجة لاننا في بلد حر ومن حق اي حد ابن ---- يقول اللي هو عايزه و الله الموفق.

فضايح أمن الدولة ... في مصلحة مين؟

أمن الدولة هو الجهاز اللي نقدر نقول انه اسم علي غير مسمي والاسم الافضل هو فحت الدولة (وربنا اعلم باللي في ضميري) او نفخ الدولة او كل اسم يعبر عن وطن اللي بيتكرع فيه نتيجة لشربه مياه غازية لازم يتكتب في ملفه الحاجة الساقعة دي كولا ولا برتقال وحجمها واسم صاحب المحل اللي باع المياه الغازية ومورد المياه الغازية و هل المواطن اللي جنب اللي اتكرع قال له صحة ولا لا. ولو قال له صحة فهل ده يعد انتماء سياسي ام اتجاه ديني مما يستلزم البحث وراء هذا المواطن ومراقبة تليفونه لحد ما يكلمه صاحب ليه او قريب ويكون مربي ذقنه فلازم اللي مربي ذقنه ده يتراقب لمعرفه هل الذقن دي انتماء لتيار الاخوان ولا راهب في كنيسة ولا السلفيين ولا قلة نظافه ولا مش معاه فلوس يحلق و لو مش معاه فلوس يحلق فهل ده ممكن يولد عنده عداء تجاه النظام مما يجعله عرضه للتجنيد من جهات خارجية فبالتالي يقدروا ياخدوا قرار بتفجير كنيسة والصاق التهمة في هذا المواطن اللي مش بيحلق ذقنه.

كل ده ظهر بعد ما رجالة محترمين مش من بتوع "عجلة الانتاج" و "وقف الحال" و "نعم للي يديني علي قفايا" و "يا سارقني وجيبي انا فاضي اسرقني كمان وانا راضي" راحوا حاصروا مباني لامن الدولة بعد ملاحظتهم  لتدمير العاملين للملفات بعد تغيير شفيق في مصادفة لم يتحدث عنها احد من بتوع حظاظة وائل غنيم. لكن اكتر ما استفزني غير طبعا ان رابطة كارهي التحرير لسة مش مقتنعين باللي بنقوله ان ظهر في وسائل الاعلام ناس بتتكلم عن نظرية المؤامرة بشكل مبالغ فيه وبشكل لا يوجد وصف ليه غير انه غبي وساذج واجتهاد مباشر لخلق دربكة وتشكيك الناس في بعضهم وتشتيتهم واللي هايخليهم في النهاية يستسلموا لاي حد يحكم سواء صالح او طالح.

اصحاب نظرية المؤامرة قالوا عن انتشار البلطجية قبل وبعد التنحي وهجومهم علي اماكن لا قيمة لها في عالم السرقة انها بسبب الفوضي اللي تسبب فيها المتظاهرون باستمرارهم في ملاحقة الفساد وقالوا عن عدم نزول الشرطة في الشوارع حتي الآن انها بسبب خوفهم من المواطنين وبرضه السبب في ده شباب التحرير واللي بقوا الشماعة اللي بيتعلق عليها كل مصيبة تحصل في البلد حتي لو كانت طول عمرها بتحصل يعني تلاقي واحد كسر علي واحد في الشارع يقوم قايل لك "ادي الثورة يا عم" وواحد يلاقي الاتوبيس زحمة يقوم قايل "الله ينتقم من بتوع التحرير" ده طبعا علي اساس انه طول عمره بيقعد في الاتوبيس علي 4 كراسي لوحده او يمكن بتوع التحرير سابوا الميدان وراحوا يزحموا الاتوبيس علشان يضايقوا الراجل ده وخد عندك من ده كتير.

أما بقي اصحاب نظرية المؤامرة اول ما اتكشف ستر أمن الدولة سألوا بطريقة نظرية المؤامرة اللي هدفها تشكيك الناس في كل حاجة حتي لو واضحة ولو نتيجتها عظيمة وكان سؤالهم : يا تري من مصلحة مين ان ملفات امن الدولة توصل للمواطنين ويعرفوا قضايا الفساد واسماء المتآمرين واللي نهبوا البلد ويكشفوا السجون السرية والمعتقلين اللي اتسجنوا بدون محاكمة ويلاقوا الناس اللي اختفت في ظروف غامضة ويعرفوا كل وسائل التعذيب وكل فضايح الجهاز والنظام  اللي بيحاولوا يحاكموه ؟!!!!!!!!!!!!!

انا مش هارد علي السؤال ومينفعش حد يرد علي سؤال هو اصلا اجابة ومينفعش ان اوهام نظرية المؤامرة تخلينا نضيع حقوقنا وتخلينا نخسر بعض ونضيع من ايدينا الحقيقة لمجرد شكنا في مين من مصلحته اننا نعرف الحقيقة.