ازمة صباع

عملنا ثورة حكمها ناس مكانوش في يوم من الثوار .. قلنا وماله ماهو برضه مجلس من جيش عظيم من الابرار

هايخاف علينا وينصرنا ضد عصابة من الكبار .. ويجيب حقوقنا من اللي سرقها ويفك عن صوتنا الحصار

5 شهور عالحكم مرت ولا شفنا ريحة الانتصار .. الكيل طفح والخُلق ضاق و خلاص ملِّينا الانتظار

نزلنا نسأل عن ثورة قامت خدها المجلس ويا ريته طار

              وبعد زمن طلعوا قالولنا ثورتنا حلوة عرفنا بيها معني الفرحة .. مطالبها مشروعة عدالة , كرامة , تعليم وصحة

مطالبكم مجابة بس انتوا قولوها وتكون لنفسيها شارحة .. واحنا علينا في الحال ننفذ لو بس كانت ظروفنا سامحة

مطالب ايه ؟ المطالب انتم تعرفوها ومن الاساس هي واضحة .. جاي النهاردة تقول لي "نهين" وعايز تلبسني الطرحة

طب اقول له ايه ده بقي ؟ اقول له المطالب ؟ ولا اقول له ...

قلنا خلاص مبدهاش ننزل من تاني اعتصام .. لحد ما ترجع حقوقنا ونلاقي تنفيذ للكلام

طلع علينا ببدلته اللي وقف للشهيد تعظيم سلام .. لكن النوبة دي كان غريب لا كان عظيم ولا كان هُمام

شَخْط وزعيق , تشويح بالايد ومكنش في أي احترام .. قال من حقك إنك تعترض بس اوعي تنسي إنِّي النظام

اسمعني قبل ما اكلمك وقبل أما انهي تديني التمام

أما صحيح مواطن بيادة , فاكرني سياسي وبتاع نقاش .. لأ إعدِل معايا لا أكدرك واطلع ... ... ولا بلاش

دا انا بدلة ميري واللي يراجعني لا كان ولا عاش .. عارفك كويس بس انت اللي تعرفني طشاش

انا ايد حديد تضرب بقوة مش ايد ضعيفة طلعت معاش .. انا ماتوصفش بإني فاشل و عالمطالب ضارب طناش

انا صقر طاير في السما وانت في عيني زي الفراش

احب اقول لك انا شاب باسل في الميدان لابس تي شيرت وبنطلون .. انا بنت جدعة في نفسي واثقة ولا همِّني سوء الظنون

 انا شيخ كبير وعالمعاش ايدي مش ضعيفة وعقلي موزون .. انا مسيحي وجنبي مسلم ولا حد فينا من الاساس مفتون

قصر الكلام انا صف واحد واقتحامه ده من الجنون .. وهاتستشيرني في كل حاجة ورأيي نافد في كل الشئون

رافض قانونك وتهديداتك وفي البلد دي انا القانون

كلامك ميخضش ده كلام يضحك وفكرتنا بايام زمان .. لو تفتكر يوم لمّا ثورنا علي ديكتاتور خسيس جبان

حشد جنوده ضدنا وعانه علينا اللي خان .. لا خفنا يوم ولا اتهزينا وعالشدة ربي وربك المُستَعان

احلامنا باينة وشايفين طريقنا والصعب هان .. ما هو شعب طول عمره اصيل وفي النهاية علي اصله بان

وانا مش هارد عليك في فيديو .. ردي عليك في وسط الميدان

مين اللي فقع البُمبَة ؟

يوم الاربعاء 6 يوليو 2011 حصلت حاجة غريبة علي مستوي محافظة القاهرة وكمان الجيزة ألا وهي سماع صوت عالي جدا مما أثار الفزع في اماكن كتير وكل واحد وصف الصوت علي حسب ثقافته. في ناس قالت "ايه صوت الإنفجار ده؟" بينما في ناس تانية اتصلوا ببعض وقالوا "سمعت الطرقعة اللي حصلت ؟" وفي ظل الظروف اللي احنا فيها كترت الاشاعات واحتارت الجماهير.

بعد سماع صوت الطرقعة مباشرة في اشاعة طلعت بتقول إن مبارك هرب في طيارة وإن الصوت ده صدر منه بعد ما تنفس الصعداء بس النفس كان كبير شوية فمخرجش من بقه بس. لكن الاشاعة دي اتضح عدم صحتها بعد ما مر وقت طويل بدون ما يصل للشعب اي ريحة.

اتجه بعض المهيجاتية الموجودين في ميدان التحرير واللي بيبحثوا علي دور البطولة إن المجلس العسكري باعت سلاح جديد عبارة عن إنسان آلي ضخم اشبه بوحوش ابو الغضب وطالبوا الناس اللي في ميدان التحرير إنهم يستعدوا ويبنوا مازنجر الخاص بيهم واصفين إن كل اللي مايشاركش في بناء المازنجر ميبقاش راجل غير إن البنات وقفوا علي جنب محاولين وضع تصميم جديد لأفروديت لا يسيء لشخصية الفتاة المصرية.

النشطاء السياسيين (اللي هم بقوا اغلب الشعب) سرحوا بخيالهم الظريف وقالوا إن الطرقعة دي هي صوت القفا اللي خده النظام الحالي بعد إعلان كل القوي السياسية مشاركتها يوم الجمعة وتوحد الصف من جديد.

وزارة الداخلية كان ليها وجهة نظر مختلفة فهي لم تهتم بمصدر الصوت او حتي التصرف المناسب لاحتواء الموقف واكتفوا بتصريح يأكد فيه إن الضباط مش عارفين يمارسوا عملهم في ظل الطرقعة اللي بتحصل في البلد.

أما الامن القومي فأكد إن مصر بتتعرض لمؤامرات خارجية و لامؤاخذه داخلية وإن جالهم معلومات عن تحرك بعض التنظيمات لإثارة الفزع وناشد الشعب المصري التصدي لتلك المؤامرات بمبدأ الاعتماد علي النفس هو سر نهضة الشعوب وما علي الامن القومي إلا البلاغ.

الناس الشقيانين واللي لحد دلوقتي عايشين في قهر من مرتبات هزيلة وجشع تجار وغياب رقابة علي الاسعار طلعوا واكدوا إن الصوت ده يبقي صوت انفجار مرارتهم اللي اتفقعت.

أما الاغلبية الصامتة فاكتفوا بتصريحهم المعهود "أدي الثورة يا عم"

وفي النهاية عرفنا إن طيار من جهة سيادية (يعني معاه واسطة) كان بيشد مع اصحابه ومخفش يتلقط رادار واصدر الصوت اللي فزع الملايين ليثبت أنه طيار تربية مبارك

عشان كنَّا رجالة ووقفنا وقفة رجالة

 ابو سويلم : محدش بينزل مظاهرات إلا اللي مفقوع من الفساد

الشيخ حسونة : طب ما انا نزلت معاكم ايام الثورة ولا انت ناسي

ابو سويلم : ودلوقتي يا عم الحلو ؟

الشيخ حسونة : يا سيدي كل عصر وله آذان والواحد لازم يشوف حاله بقي ولا هانقضي عمرنا كله مظاهرات دا احنا ايام الثورة ...

ابو سويلم : ايوة ايوة ايوة ايام الثورة نزلنا في جمعة الغضب انضرب علينا غاز لما عمينا شمينا خل غسلنا وشنا بكوكاكولا مع اني مقاطع لا تعبنا ولا اتهدينا ليه ؟ لاننا كنا رجالة ووقفنا وقفة رجالة

وفي ميدان التحرير اترمينا في عز البرد علي الارصفة والاعلام كان بيصور تحت الكوبري عند المراكب ام 2 جنيه قالوا علينا خونة , مندسين , بناكل كنتاكي إنما كنا رجالة ووقفنا وقفة رجالة

وفي يوم معركة الجمل بلاش نتكلم عن الحصنة انما احنا وقفنا جنب بعض ودافعنا عن الميدان كانت النتيجة ايه ؟ قالوا فتنة وانضربنا حتي من الجمل .. لكننا كنا رجالة ووقفنا وقفة رجالة

ولما دخلنا مقرات امن الدولة وهم بيحرقوا الادلة ولقينا اسلحة وطلعنا بدل رقص وملابس داخلية سلمناها للنائب العام و كنا رجالة ووقفنا وقفة رجالة

وبعدين ؟ دلوقتي بنعمل ايه ؟ كل واحد قال يلا نفسي كل واحد خاف علي شغله ومنصبه وقال طز في الباقيين. انت .. انت يا عم الحلو انت جريت علي برامج التوك شو علشان تقعد في التكييف ويتقال عليك نخبة. والامور التاني .. يا عيني علي الامور التاني عمل له برنامج علشان يحكي فيه بطولاته ويبقي اشهر واشهر. وانا .. انا ايه ؟ انا اهبل .. اهبل علشان صدقت ان الثورة خلصت ورجعت بيتي استحميت ونمت لعبت بلاي ستيشن 3. اتاري الفساد هو هو ومحاوطنا ومكتفنا وبيسرقنا من جديد ويظلمنا من جديد. لكن فين ؟ فين ؟ كانت ايام .. ايام التحرير ماتتعوضش كان عندنا هدف كان عندنا حلم كنا ايد واحدة كنا أمل البلد وطوق نجاتها. وادي النتيجة اللي وصلنا لها دلوقتي قاعدين نفكر ايه اللي يبقي الاول الدستور ولا الانتخابات

قابل يا عم الحلو .. ادي واحد جعان وادي مظلوم وادي عاطل وده معرفوش وغيرهم من اهل البلد قاعدين يتفرجوا علينا واحنا بناخد علي قفانا لاننا ماسكين في بعض وبنقسم التورتة. اللي يقول الدستور اولاً واللي يقول الانتخابات واللي يقول نهدأ واللي يقولك بلطجة بقينا بنقول اي كلام بنسمع اي كلام مبنفهمش اي كلام كل اعمالنا بقت كلام في كلام في كلام

الشيخ حسونة : اه يا ابن اللعيبة والله وقدرت تهزأني بالادب

الشيخ يوسف : والله وفكرتنا بايام ما كنا رجالة بجد

الشيخ حسونة : والله انت كبير , برنس .. بص يا معلم انا فعلا نسيت نفسي وضيعت هدفي .. الدستور ولا الانتخابات مش عارف ايه الاول

الشيخ يوسف : يا سيدي ايام التحرير لا كنا بنفكر في ده ولا ده

الشيخ حسونة : ولا دلوقتي كمان , اسمع يا نجم انا هاقف معاك تاني ونوحد تاني صفنا هانبقي واحد لحد ما تاخد حقك وكل واحد اتظلم ياخد حقه واللي يسمونا بلطجية .. طز في اللي جابوهم

عبد الهادي : يبقي ننزل يوم الجمعة

الشيخ يوسف : الله ينور عليك يا كبير

عبد الهادي : ايوة ننزل يوم الجمعة

ابو سويلم : وننزل كل جمعة كمان

ما هو مفيش غير كدة ومالهاش حل تاني  

صوت السلبية

رجعت وقلت انا مش نازل .. وخلاص عن حقي انا هاتنازل

ارجع  ياللي للثورة عامل .. وعايز تحل كل المشاكل

بتقول دي بلدنا نبنيها  .. ما احنا عايشين راضيين بيها

عايزنا قال نصلحها .. ونحاسب كل اللي خربها لالا

لكل دماغ فيها زبادي .. صوت السلبية بينادي

سلمنا روحنا لخصمنا .. علشان الجوع بيهزنا

ممكن نسيب حقنا .. لكن نلاقي اكلنا

لو كنت اهبل زيينا .. بلاش تهذي وتقول لنا

نصبر علشان حلمنا .. واعرف تقول كلمة اناااا

لكل دماغ فيها زبادي .. صوت السلبية بينادي

ايادي سلبية هبلة ولا ليها في التمييز

في وقت ضرب النار بتقفل الترابيس

رجع الشباب العبيط وقلب بلاده غيط

وحققوا المهزلة رجع الحرامي من حبسه

اسرقني .. سرقتك لي مش هاتزعلني تاني

ولع في كل حاجة واسرق في اوطاني

العزة ولا الاكل .. الاكل اهم كتير

مش عايز افهم حاجة ودماغي عاجباني

العمل في الهبل .. والابداع في الضياع

بعد قضاء فترة ليست بقصيرة تحت مظلَّة التعليم - وصف التعليم بالمظلة لتأكيد إنه بيقوم بنفس المهمة اللي هي منع وصول الشمس لكل اللي واقف تحتها- دقت ساعة العمل والإنتقال من مُسمَّي طالب إلي مُسمَّي موظف ومع التدقيق اللُغوي هانلاقي إن طالب اسم فاعل في حين إن موظف اسم مفعول وإحقاقاً للحق فأثناء المرحلتين احنا بنكون المفعول ولا وجود لنا في جانب الفاعل. اكثر ما يؤلم الانسان هو أن يكتشف أن ما كان يكرهه رحمه وهو ده اللي حصل مع اغلبنا بعد التخرج لمّا خرجنا من الكلية كلنا أمل وحماس ورغبة في إثبات الذات وتجاوز حماقات الماضي لكننا اتفاجئنا بكومة ضخمة من الحماقات في الغالب هي اضخم من اللي كانت في الكلية وإليكم بعض الحقائق المُرّة الخاصة بطبيعة العمل.

أول حقيقة في العمل هي مبدأ البركة الشبيه بمدأ سواقين الميكروباص اثناء سواقتهم جنب ترعة في طريق مظلم حارة واحدة "كله علي الله". والبركة في العمل بتبدأ من البرنامج التأهيلي للموظفين الجدد واللي بيكون تحت عنوان "علم نفسك اللي انت مش عارفه ولازم تعرفه" أو ساعات بيكون عنوانه "الشغل هو اللي بيعلم" وغالباً اللي بيقول كدة كان شغال مدرب سباحة قبل ما ينضم للشركة لكن نظراً لوفاة اغلب المتدربين علي ايده انتقل إلي الشركة مع حصوله علي شهادة معاملة خاصة يتم اخفاءها عن الموظفين الجدد لكن الموضوع بيتعرف بعد وقت.
تاني مجال لتطبيق البركة في الشغل هو الشغل نفسه وسواء كنت تعمل في مجال التصميم أو المبيعات أو حتي التنفيذ بتكون قراراتك مبنية علي اُسُس قوية ألا وهي التجارب المتوارثة بين الأجيال بدون معرفة ما وراء القرار وسبب اتخاذ القرار أو حتي مين اللي اخده وتلاقي نفسك بتسأل سؤال منطقي "طب لو حاجة جديدة حصلت ؟!" بعد سؤالك ده لمديرك أو زملائك هاتحصل علي فترة من الصمت يعقبها فترة تأمل يعقبها فترة حيرة وبعدين هايسيبوك ويمشوا.

ثاني حقيقة في العمل هي استخدام فن التمثيل في غير محلُّه , لمّا تلاقي الموظفين عاملين نفسهم بيشتغلوا –مع ان مفيش حاجة تتعمل- والمديرين عاملين نفسهم بيشرفوا علي الموظفين اللي عاملين إنهم بيشتغلوا والمدير العام بيعمل نفسه معجب بإشراف المديرين اللي عاملين نفسهم بيشرفوا علي الموظفين اللي عاملين نفسهم بيشتغلوا بالرغم من انه عارف كويس إن مفيش حاجة تتعمل في الشغل بس الحمد لله يوم قبض المرتب الموظفين بيقبضوا فعلاً والادارة مش بتعمل نفسها بتقبَّض الموظفين.

ثالث حقيقة هي إن مناصب الشركة محجوزة لنوعية معينة من الموظفين , إما الموظفين ذوي القدرات المحدودة واللي ما بيصدقوا يلاقوا مكان يلمهم , أو للمتورطين في التزامات (جواز وعيال) فرضت عليهم التخلي عن حب المغامرة , إما الاشخاص معدومي الطموح. الخلاصة لمّا تقابل مديرك وتعرف إنه شغّال في الشركة من أكتر من 5 سنين فقبل ما تحترمه وتتخذه مثل أعلي حاول تعرف هو أنهي نوعية من النوعيات السابق ذكرها.

رابع حقيقة هي إن في كلمة لازم تنساها علشان متحسش بألم في القلب ألا وهي كلمة "ابداع" واللي بتكون في أول حياتك هدف وبمرور الوقت بتتحول لشيء مفقود تبحث عنه بشغف وبمرور وقت أكثر بتبطل تدور عليه وفي النهاية لمّا حد هايسألك هو مفيش ابداع هاتلاقي نفسك بتقول له "ابداع ؟! اه ابعت الاوفيس بوي يشتري لك من السوبر ماركت اللي تحتنا علشان اللي في الثلاجة عندنا خلص".

حقائق لزجة القوام و مُرة المذاق وقميئة المظهر ولكنها منتشرة في أغلب مواقع العمل ويجب وضعها في الاعتبار في جميع الاوقات لكي ننسجم مع ذلك الخليط القذر دون أن نتخلي عن طموحاتنا وأحلامنا.

حكاية ماتش كورة

مرة فريق كورة كان بيلعب ماتش مع خصم قوي وكان كسبان 2 – 0 وفاضل لسة كتير علي نهاية المباراة وفي وسط اللعب وقف الفريق يتخانق مع بعضه علي مين اللي هايشيل الكأس لما يكسبوا فقال المهاجم الاول : انا اللي المفروض اشيله لاني انا اللي جبت الجون الاول واحنا كلنا كنا مستبعدين اننا نعرف نجيب فيهم جون قام المهاجم التاني قايل يا سلام طب ماشيلوش انا ليه ؟ ما انا اللي جايب الجون التاني وهو ده اللي احبطهم وخلاهم ينهاروا. فرد الثالث بالنيابة عن لعيبة خط النص : وهو انتوا كنتم تعرفوا تعملوا حاجة لولا خط النص دا هو اللي كان رابط بينكم وبين الدفاع وهو اللي لاعب ليكم الكورتين يبقي احنا اللي المفروض نشيل الكأس لما نكسب. قام واحد لسة نازل قال : ومشيلوش انا ليه ؟ انا اكتر واحد بيعبر عن الجمهور هنا والمفروض انا اللي اشيله. قام واحد رد عليه وقال له : انت اصلا مكنتش بتلعب ساعة ما جبنا الاجوان وانت طول عمرك قاعد علي دكة الاحتياطي يبقي ازاي تشيل الكأس ؟ قالوا خلاص احنا نسأل الجمهور

راحوا للجمهور وقالوا ها يا جماعة تختاروا مين مننا يشيل الكأس لما نكسب. جزء من الجمهور رد احنا عايزين اللي جاب الجون الاول فرد جزء تاني من الجمهور وقال لا طبعاً احنا الاغلبية وعايزين الاخ بتاع نص الملعب فرد جزء تالت و قال احنا عايزين اللي لسة نازل هو اكتر واحد بيعبر عننا. فجي شباب من نفس الفريق بينهجوا ومرهقين جداً وقالوا : يا جماعة الحقوا النتيجة بقت 2 – 2 وانتم سايبيننا نلاعبهم لوحدنا ... احنا خلاص تعبنا ومش قادرين. ردوا قالوا : مش هانلعب غير لما نتفق مين فينا اللي هايشيل الكأس. فقال الشباب : يا خبر اسود دول جابوا الجون التالت .. احنا كدة بنخسر احنا رايحين نلعب. المهاجم الاول قال : طب يا جماعة نروح معاهم ولا ايه احنا كدة مش هانكسب ومش هايبقي في كأس نشيلة. رد المهاجم التاني : ماشي نروح بس انا اللي اشيل الكأس. فرد قائد نص الملعب : يا سلام عايزيننا نلعب وفي الآخر تدونا صابونة وانتوا اللي تشيلوا الكأس. فقال المهاجم الاول : والله انتوا هاتخربوها واللي زيكم مايستاهلش العب معاه اصلاً.

رجع الشباب مرة تانية وخلاص مش قادرين يمشوا وقالوا : يا جماعة النتيجة بقت 5 – 2 اعملوا حاجة تعالوا معانا. اللعيبة بصت لبعضها بتحدي بعدين كل واحد ادي التاني ظهره قام الشباب باصص للجمهور وقال له : يا جمهور اعملوا حاجة قولوا ليهم يلعبوا معانا علشان نكسب. قام مجموعة من الجمهور سكتت وبصت في الارض ومجموعة قالت لما نضمن ان الاخ بتاع نص الملعب هو اللي هايشيل الكأس ومجموعة قامت رجعت بيوتها .... وتوتة توتة لسة مخلصتش الحدوتة يا تري هاتبقي حلوة .. ولا هاتفضل ملتوتة ؟؟أسأ

حب المجهول .. شعب وعسكر

بغض النظر عن موقف المجلس العسكري وعن الوضع الداخلي للجيش المصري لفت انتباهي ظاهرة غريبة جداً وهي الحب والمناجاة بجهل. معرفش ازاي الواحد يبقي بيحب حد جداً وبيثق فيه ثقة عمياء بالرغم من انه يجهل اقل المعلومات عنه واحياناً كمان الموضوع بيكون بديهي بس القدرات الذهنية مش بتساعد. لفك غموض الكلام اللي بقوله هاقول مجموعة مواقف اثارت دهشتي اولهم تلك المرأة من ميدان مصطفي محمود -اللي كان بتاع الثوار يوم 25 بس بعد كدة اتلوث- لما كانت بتناشد الحاكم العسكري للبلاد وبتقول "انا بناشد سيادة اللواء مشير طنطاوي"  اكرر سيادة اللواء مشير طنطاوي. مبدأياً هو الراجل مش هايعبرها لانها ضيعت عليه سنين ورجعته لواء بعد ما وصل لرتبة مشير (ترتيب الرتب لواء - فريق - فريق اول - مشير) فهو اكيد بعد المناشدة دي هايحس باحباط شديد جداً وانا كنت منتظر انها تقول "انا بناشد سيادة اللواء مشير طنطاوي وبقول له يا سيادة الملازم" علشان تبقي جابت من الآخر والمشير طنطاوي ينتحر. بس بعيداً عن ده كله جي في بالي سؤال ... يا تري هي عارفة انه جيش ولا فاكراه شرطة ؟

تاني موقف صدر من احد محبي احمد شفيق اللي برضه بغض النظر عن اي حاجة تتعلق بيه فأنا مش عارف هي الناس لحقت تحبه في الاسبوعين اللي قعدهم واختاروا يرشحوه للرئاسة نتيجة لايه ؟ يعني عمل ايه اثار اعجابهم قوي كدة ؟ المهم المحب ده قال حكمة يشهد لها الزمان ,ويسجلها التاريخ , وتتناقلها الاجيال .. قال "كفانا حكم عسكري ... نرشح الفريق احمد شفيق رئيساً لمصر" انا طبعاً الود ودي اكتب علي الحكمة دي 4 صفحات من علامات التعجب. انا معرفش هو الاخ ده مدخلش جيش ؟ ماخدش تربية عسكرية في الجامعة ؟ طب مقراش كتاب التربية الوطنية في اولي ثانوي ؟ طب مقعدش مع الست بتاعة اللواء مشير طنطاوي واستقي من علمها وعرف ان لقب فريق لا يطلق فقط علي مجموعات لعب الكورة او محترفي الموسيقي انما كمان بيعبر عن رتبة عسكرية. بلاش دي طيب مسمعش سيادة الفريق لما قال انه حارب في 6 اكتوبر وقتل واتقتل ولا هو فهم انه يقصد 6 اكتوبر المنطقة اللي في الجيزة وبقت محافظة وانه كان واد مخلص وشقي وبيقفل شوارع بس لما كبر عقل وبقي يلبس احدث صيحات الموضة من البلوفرات. بس لو احسنت الظن بيه ممكن يكون تم تشتيته لما عرف ان شفيق كان وزير الطيران المدني فهو مسك في كلمة مدني دي وارتبط بيها وبني عليها احلامه. او ممكن يكون بالفعل قعد مع الست بتاعة اللواء مشير طنطاوي وفهم منها ان "فريق" ده اسمه وابوه اسمه احمد. المهم هذا الشخص قرر ترشيح شفيق للرئاسة بدافع قوي جدا الا وهو اعتراضه علي الحكم العسكري.

تالت موقف (نكتة) لقيت واحد بيطالب الفريق سامي عنان –بس المرة دي هو فاهم ان رتبته فريق- واللي هو رئيس اركان الجيش المصري انه يرشح نفسه للرئاسة كمستقل عن الجيش –مرة اخري 4 صفحات من علامات التعجب مصحوبة بحالة اغماء- وبكدة يكون اول شخص يطالب اهم مركز في الجيش المصري بانه ينزل الانتخابات مستقل عن الجيش .. طبعاً علي اساس ان الجيش ده حزب وطبيعي ان يبقي ليه مرشحين. بس هو السؤال الحيوي جداً هنا .. لو رئيس اركان الجيش استقل عن الجيش هل اللي هايتولي منصب رئيس الاركان هو سيادة اللواء مشير طنطاوي ؟ ولا عناصر الجيش هايتحركوا كفئات مستقلة ؟