الاهتمام بالامور الداخلية

ظهر من فترة موضة او ستايل في اللبس يتطلب اظهار بعض الامور الداخلية وفي شباب بقي ماشي في الشارع مسقط بنطلونه مبرزا تلك الامور متباهياً بيها والوضع ده استفز ناس كتير لدرجة انهم عملوا جروبات علي الفيس بوك منها "ارفع بنطلونك لو سمحت ذنبي ايه اشوف اللي تحت" و"ارفع بنطلونك لاجي اقلعهولك" مهاجمين الموضة دي وبيحاولوا يفهموا الشباب سببها ومين اللي ابتكرها والغرض الحقيقي منها.

ولو اني ضد الموضة دي الا اني معجب بابداع الشباب وذوقهم في اختيار الامور الداخلية. يعني تلاقي واحد لابس بتاع مرسوم عليه كرات بيضاء وحمراء مدعياً انه عنده دم. وواحد تاني حزايني شوية فتلاقيه اسود وعليه نجوم. وفي شباب بتميل للطفولة يعني تلاقي لابس بتاع عليه جاروف بحر وشمسية زي المايوه اللي كنا بنلبسه فوق الكافولة. ومن ده كتير وكل بتاع بيوضح احساس اللي لابسه.

بناء علي الظاهرة دي وبناء علي الفكر الاستثماري فانا فكرت في مشروع رهيب ... مصنع امور داخليه بس طبعا التميز مطلوب وعلشان كدة انا هاعمل قسم لتلقي طلبات الشباب ونصمم الامور دي بالقطعة تحت الطلب. يعني مثلا شاب يبعت لي يطلب بتاع ينفع علشان الفلانتين نقوم نصمم بتاع عليه قلوب او دباديب. وواحد تاني يطلب بتاع علشان يلبسه في الاستاد نقوم نصمم له بتاع عليه حارس مرمي بينط ويمسك الكورة وده لان حارس المرمي نص الفريق. وطبعا ممكن نصمم بدل مزودة بجزء شفاف يتيح للناظرين رؤية الامور الداخلية لمرتدي البدلة وممكن نسميها بدلة مزودة بخاصية اظهار البتاع.

بس فكرت لقيت ان ممكن ناس تطلب طلبات غريبة او يعاقب عليها القانون .. وبكدة ندخل في مشاكل وحوارات ورؤساء العرب يجتمعوا ويشجبوا ويستنكروا وممكن المنظمات العالمية تنتقد الاوضاع في مصر من اضطهاد الشباب من راغبي اظهار امورهم الداخلية ويطلعوا في مظاهرات وتحصل فتنة ومرتضي منصور يرفع علي قضية ونبيه الوحش يرفع علي مرتضي منصور قضية لانه رفع علي قضيه وندخل في قلق كبير انا مش قده فتوقفت عن احلامي وقررت ابتعد عن المشاكل واخد بالمثل الشعبي ... ابعد عن ال--- وغنيله.

يا فهلوية .. ايه يالالالي

الفهلوة بقي لغة العصر وهي المهارة الوحيدة المطلوبة علشان تعيش مرتاح بس المشكلة لما كل الناس تتفهلو مش هايبقي في معني ولا تميز للفهلوة علي رأي توفيق الدقن في الشيطان يعظ "اما كل الناس هاتبقي فتوة .. امال مين اللي هاينضرب؟! " وبعدين من ساعة ما الفهلوة نزلت شعبي وبقت في ايد الكل زي الموبايلات وهي حالها مبقاش زي زمان ... ياااااه ايام الخير لما كان الفهلوي بيتقال عليه ده بيلعب بالبيضة والحجر ويبقي نصاب عظيم وبيعرف يشتًغل ناس كتير. لكن الصيني من الفهلوة تلاقيه عبيط وغبي غباء مباشر.

يعني لما اروح لفكهاني واقول له كيلو موز يا ريس يقوم يدخل في تجربة فاشلة من الفهلوة ويقول لي ايه 2 كيلو يا استاذ قمت عامل عبيط وقلت له لا يا ريس كيلو واحد بس قال لي طيب .. قطع ووزن فلقيته بيقول لي بقول لك يا باشا طلعوا كيلو ونص تمام ؟؟ انا طبعا حسيت بسيول السذاجة بتمطر علي من عينيه وسرحت للحظات وقلت لنفسي يعني هو الفكهاني اللي اغلب شغلته انه يوزن اتلخبط وطلع غصب عنه وبكل دقة نص كيلو زيادة وبعدين هو منتظر مني ايه اقول له .. ياه يا ريس دي اشارة من ربنا اني لازم اخد كيلو ونص يلَا علي البركة!! حاجة تحرق الدم.

ولما سواق نص نقل نتفق معاه علي الطريق والحمولة والاجرة وييجي لما نوصل يبدأ بكل محبة يساعد في التخلص من الحمولة وتيجي تحاسبه تلاقيه يدخل هو كمان في تجربة فهلوية هابطة الآداء ويقول انه مش عاجبه  الحساب ده بالرغم من ان دي الاجرة المتفق عليها وبتكون الحجج عبيطة قوي يعني يقول اصل مكنتش فاكر ان السكة طويلة كدة .. اللهم اجعله خير السكة طولت عن ما كان متخيل حتي لو حصل دي مشكلة خياله المحدود ما هو اكيد المحافظة مش هاتلحق تطول السكة واحنا ماشيين فيها وسبب تاني يقول اصلي نزلت معاكم الحمولة وكنت ممكن اسيبكم تنزلوها لوحدكم .. يعني هو كان حد توسل اليك تنزل معانا وبعدين انت عملت كدة علشان تمشي بسرعة مش اكتر .. و في كل المحاولات دي بيستخدم سيف الحياء ضد الزبون بانه يفضل يزِن علشان تتكسف وتنجز في الوقت اللي هايضيعه لو فضلت تفاصل معاه –مع انه موضوع منتهي من اساسه- وبرضه علشان تتقي شر الفضيحة اللي هايعملها لو مخدش الاجرة اللي هو عايزها وعلي فكرة مهما زودت ليه في الاجرة مش هايرضي. 

وغير النماذج دي في نماذج كتير جدا حوالينا لمحاولات فاشلة للفهلوة اللي فعلاً هيبتها راحت وحالها بقي لا يسر متفهلِو ولا متفهلَو عليه والبيضة والحجر اختفوا ودلوقتي البيضة بقت مصنوعة من الحجر تبقي ايه المهارة في اللعب بيها ؟؟

كل واحد يمسك اللاسلكي بتاعه بقي

اكتر من مرة يحصل لي موقف مش ولا بد ومع جهات مش من النوع اللي ينفع يتعمل معاها اي موقف خالص. يعني اتذكر مرة كنت رايح القلعة وبعد ما عديت من البوابة لقيت واحد عادي خالص بيقول لي بطاقتك قلت له ليه قال لي معاك ولا مش معاك رديت بكل قوة معايا بس مش بطلعها لاي حد لقيت واحد جاي من وراه وماسك لاسلكي (مما يدل انه اللهم احفظنا) وبيقول له في حاجة يا ابراهيم فبص لي قلت له البطاقة اهي يا استاذ ابراهيم .. البوكس منين؟؟

مرة تانية كنت راكب من التحرير ميكروباص هرم وطبعا كعادة السواقين بيقسموا الطريق علي كيف كيفهم فكان رايح لحد الطالبية .. انا ماليش دعوة انا نازل الطالبية و فجأة جي من الشباك واحد سألني عريش (محطة بعد الطالبية) قلت له لا قال لي لا رايح عريش وركب ولما ركب لقيت معاه لاسلكي قلت له والله السواق اللي قال طالبية بس.

المرة الثالثة كنت في المترو واثناء مروري من البوابة (الماكينة كما نطلق عليها) بتذكرتي جي واحد وحاول يعدي معايا .. انا متعود ان الاشكال دي بتعامل معاها بكل قسوة لاني بعتبره بيسرقني ويستغفلني ويضربني علي قفايا قمت شادد البوابة بعد ما عديت لقيته ماسك فقمت شادد قام هو كمان شادد وهو يشد وانا اشد فاتعصبت وقلت له ايه في ايه قال لي انا اشتراك قلت له وانا مالي ما تطلع الاشتراك فلقيته مستغرب وبيأكد علي انا اشتراك قلتله برضه وانا مالي لقيت واحد جاي من وراه وماسك اللاسلكي اياه وبيقول له في ايه قمت رجعت وعديته وكنت في قمة سعادتي وهو بيسرقني ويستغلني.
وعلشان كدة انا اناشد وزارة الداخلية انهم يطلبوا بكل هدوء ومودة ومحبة من الضباط اللي مش لابسين الزي الرسمي انهم يمسكوا اللاسلكي بتاعهم او يعلقوه في رقبتهم لان مش كل مرة تسلم الجرة.

كله سخافة وعبط وجنون بيضر تمام زي الشيشة

لما الانسان بيحس بفراغ بيحاول انه يتخلص من الفراغ او يخرج منه . احد الوسائل اللي كنت فاكرها مفيدة للخروج من الفراغ هي التليفزيون (التلفاز بالفصحي) ولما اشتريت فراغ حلو كدة ومن النوع الكبير لجأت للتليفزيون وكانت الصدمة. مجموعة ناس سخيفة بتستظرف وبتستخف وفيما بعد اكتشفت اني المفروض اضحك لان ده عمل كوميدي فبعت للقنوات دي علشان يعملوا تنبيه قبل العرض انه "عمل كوميدي برجاء الضحك" ويستحب انهم يراعوا كبار السن والمرضي ويكتبوا "البرنامج يحتوي علي مشاهد قد تصيبك بانسداد الشرايين" ويا ريت لو يراعوا الاطفال بجملة "برجاء ابعاد الاطفال اقل من 12 سنة والا سيصابوا بالتخلف العقلي". اما بالنسبة لقنوات الافلام .. ثلاث قنوات عليهم فيلم ابو علي في نفس الوقت واللي بالي بالك جي ثلاث مرات علي نفس القناة في يومين. قلت خلاص اشوف الاجنبي بيقولوا عليه كويس وفعلا فضلت اتفرج يوم ويومين واسبوع واسبوعين وبعد كدة حسيت ان في افلام كتير جدا بتتكرر وبدأت احول واتفرج علي الحتت اللي عاجباني في الفيلم .. لكن عمليا انا كدة مش بتسلي .. انا كدة براجع الافلام علشان لو حد امتحني فيها فشعرت باتساع الفراغ عن ما اشتريته ما هو هو الفراغ كدة زي الكوتشي .. بيريح مع اللبس.

بعيدا عن كل اللي حصل ده في حاجات غريبة بدأت احس بيها منها العبودية يعني بتوع القنوات دول بيتحكموا في جداً هم اللي بيختاروا الوقت اللي يناسبهم علشان يفرجوني علي الفيلم ده طبعا غير الاعلانات اللي بتطلع في النص زي اخو خطيبتك .. سخيف وغلس وبيفصلك ومجبر انه يبقي موجود.

الشعور الثاني التحول .. وده بيكون حسب الميول الشخصية في ناس بتتحول لجزرة مالهاش اي ايد ولا رجل ولا بيتعمل بيها حاجة غير انها تتقطع وناس تانية بتتحول لحمير ودان طويلة وبوذ ممدود وذيل وبيبقي ناقص بس البردعة. الشعور الثالث هو الهبوط .. يعني الواحد بيهبًط كدة ويبقي كسلان لانه بيقعد بالساعات اقصي تمرين ومجهود عضلي بيكون من نصيب الصوابع وبالاخص الابهام واحياناً الابهام بيحس بارهاق فبيشغل السبابة ولايد واحدة كمان.

الله يرحمك يا سعاد يا حسني لما كنتي بتقول عليه كله ثقافة وعلوم وفنون .. معرفش وجهة النظر دي كان مصدرها ايه؟

التنمية البشرية المعاصرة

من كام سنة كدة ظهر اختراع اسمه التنمية البشرية وقعدت فترة الناس تتعلمها لحد ما الموضوع اتفحت واتردم زحليون مرة وتحول بمرور الزمن الي سبوبة واكل عيش بيسترزق من وراه ناس كتير من اللي بيلبسوا بدل ويتحطوا علي بوستر طويل ويتكتب جنبه "المدرب المعتمد في التنمية البشرية" علي غرار بتوع الدروس الخصوصية "امبراطور الكيمياء" و "برنس الفيزياء" و "لول الرياضة"

انا مش معترض علي فكرة التنمية البشرية لكني معترض علي ان كل من هب و دب بقي يعمِل فيها مدرب عالمي وبقت زي ما بيقولوا شغلانة اللي مالوش شغلانة يعني اي حد لسانه حلو وقرأ له كتابين لمؤلفين محترمين بقي مدرب عالمي مع انه لا درس علم نفس ولا ليه خبرة ولا مر عليه موقف من اللي بيحكيهم. وبم ان كل الناس لابسة وش التنمية البشرية فيبقي انا كمان من حقي ادوس في السكة دي وعلي البركة

الكورس العظيم بتاعي هايكون بسيط وسريع ومن الآخر هاكتب العنوان وبجمله اشرح الكورس

Team Work  : كل واحد في الفريق يلم نفسه وميفتكرش انه هايوصل لحاجة بدون بقية اعضاء فريق.

Communication Skills : خليك مؤدب مع خلق الله .. اسمعهم .. احترمهم .. كلمهم كويس .. عاملهم بدماغهم.

Self Confidence : ما دام خططت ودرست قبل ما تنفذ .. يبقي تخاف من ايه يا اهبل.

Time Management : رتب اولوياتك وانجز بلاش لكاعة.

Presentation Skills : اعمل نفسك فاهم وكدة كدة اللي قدامك عامل نفسه بيسمع ولو سأل حاول تجاوب منفعش فسًحٌه.

Self Motivation : متبقاش زي العربية العطلانة .. مستني حد يزق .. العربية دي محدش بيحترمها ابداً وبيهربوا من زقها.

Leadership : علشان تبقي ريس .. لازم ماتتمريِسش .. وخليك الحضن الحنين.

وبعد قراءة الموضوع ده بيكون القاريء مؤهل انه يدِي كورسات تنمية بشرية ويحط صورته علي بوستر طويل بس علي فكرة في مهارات تانية كتير جدا .. بس هم دول اللي وصلوا السوق المصري.

البطالة كنز لا يفني

البطالة كلمة بتوجع بطن ناس كتير وناس بتنهار بسببها وحكومات بتتشال لو مقدرتش تقضي عليها – طبعا مش كل الحكومات- لكننا لو بصينا بنظرة عادلة للبطالة هانلاقيها كلها مزايا. بتظهر المزايا من اول اليوم لاخره من اول ما تصحي براحتك وقت ما تحب وتفطر زي البني آدميين وتتناول كوب من مشروبك المفضل وتختار اللبس المناسب الانيق مروراً باختيار برنامج اليوم بمطلق الحرية والذي يفسح المجال وبشدة لاظهار المواهب المكبوتة وفي وسط اليوم ييجي وقت تناول وجبة الغداء واللي برضه بتختاره بنفسك وتأتي الفقرة المسائية واختيار طريقة قضاءها بكل حرية.

انما بقي لو شغال .. خد عندك .. تقوم في المعاد اللي يناسب الشغل حتي لو قمت مش قادر تفتح عينيك وطبعا لما يبقي الاختيار ما بين النوم والفطار فبيكون النوم احق ودائماً الفائز وطبعا مفيش مشروب مفضل ولا نيلة ما هو واحد مش واكل هايشرب!!. وتنزل كل يوم عارف انت رايح فين .. هو هو نفس المكان الكئيب حيث يرقد الموظفون وحيث الموطن الاصلي للمدير العزيز وتمر ساعات العمل في غياب تام للاختيار وللوجود الانساني ولما تنتهي ساعات العمل بتكون ساعاتك انت كمان انتهت وتروح وتترمي علي السرير علشان تلحق تنام وتصحي تاني يوم علشان .... برجاء اعادة قراءة الفقرة السابقة الي ما لا نهاية.

وعلشان كدة اقدر اقول ... خليك عاطل يحتار عدوك فيك

البركة للتجارة .. فلوسك مش خسارة

 

المنتج الذي انتظره الجميع والذي طال البحث عنه نحن نقدمه اليوم .. انه القصافة الذكية

قصافة مصنوعة من المعدن (مش من البلاستك) تستخدم في قص الاظافر (مش حلاقة الذقن مثلا) .. انها القصافة الذكية لديها القدرة علي قص اظافر الخنسر والبنسر والوسطي والسبابة (ما هي صوابعك مش زي بعضها) والمفاجأة يمكن استخدامها في قص ظفر الابهام ايضاً .. القصافة الذكية مزودة بمبرد دوار يدور علي مسمار معدني ب 360 درجة (بالرغم ان 180 درجة كفاية)  .. القصافة مزودة بدلاية يمكن تعليقها في ميدالية المفاتيح (بحيث لو اظافرك طلعت مرة واحدة وانت برة البيت) .. اذا اتصلتم الآن ستحصلون علي مقص هدية .. نعم مقص متعدد الاستخدامات يستخدم في قص الاوراق المكتبية وعمل زينة اعياد الميلاد ويمكن استخدامه بدلا من القصافة ايضاً (ماهو زي القصافة بنفس الفكرة العلمية)

كل هذا ب 150 جنيه + مصاريف الشحن

سعر المنتج ثابت سعر الشحن ثابت (بس علي الله المنتج يطلع ثابت)