ظهر من فترة موضة او ستايل في اللبس يتطلب اظهار بعض الامور الداخلية وفي شباب بقي ماشي في الشارع مسقط بنطلونه مبرزا تلك الامور متباهياً بيها والوضع ده استفز ناس كتير لدرجة انهم عملوا جروبات علي الفيس بوك منها "ارفع بنطلونك لو سمحت ذنبي ايه اشوف اللي تحت" و"ارفع بنطلونك لاجي اقلعهولك" مهاجمين الموضة دي وبيحاولوا يفهموا الشباب سببها ومين اللي ابتكرها والغرض الحقيقي منها.
ولو اني ضد الموضة دي الا اني معجب بابداع الشباب وذوقهم في اختيار الامور الداخلية. يعني تلاقي واحد لابس بتاع مرسوم عليه كرات بيضاء وحمراء مدعياً انه عنده دم. وواحد تاني حزايني شوية فتلاقيه اسود وعليه نجوم. وفي شباب بتميل للطفولة يعني تلاقي لابس بتاع عليه جاروف بحر وشمسية زي المايوه اللي كنا بنلبسه فوق الكافولة. ومن ده كتير وكل بتاع بيوضح احساس اللي لابسه.
بناء علي الظاهرة دي وبناء علي الفكر الاستثماري فانا فكرت في مشروع رهيب ... مصنع امور داخليه بس طبعا التميز مطلوب وعلشان كدة انا هاعمل قسم لتلقي طلبات الشباب ونصمم الامور دي بالقطعة تحت الطلب. يعني مثلا شاب يبعت لي يطلب بتاع ينفع علشان الفلانتين نقوم نصمم بتاع عليه قلوب او دباديب. وواحد تاني يطلب بتاع علشان يلبسه في الاستاد نقوم نصمم له بتاع عليه حارس مرمي بينط ويمسك الكورة وده لان حارس المرمي نص الفريق. وطبعا ممكن نصمم بدل مزودة بجزء شفاف يتيح للناظرين رؤية الامور الداخلية لمرتدي البدلة وممكن نسميها بدلة مزودة بخاصية اظهار البتاع.
بس فكرت لقيت ان ممكن ناس تطلب طلبات غريبة او يعاقب عليها القانون .. وبكدة ندخل في مشاكل وحوارات ورؤساء العرب يجتمعوا ويشجبوا ويستنكروا وممكن المنظمات العالمية تنتقد الاوضاع في مصر من اضطهاد الشباب من راغبي اظهار امورهم الداخلية ويطلعوا في مظاهرات وتحصل فتنة ومرتضي منصور يرفع علي قضية ونبيه الوحش يرفع علي مرتضي منصور قضية لانه رفع علي قضيه وندخل في قلق كبير انا مش قده فتوقفت عن احلامي وقررت ابتعد عن المشاكل واخد بالمثل الشعبي ... ابعد عن ال--- وغنيله.
ههههههههههههه
ردحذفهههههههههههه.... جامد جدا جدا !!!!!
ردحذفههههههههههههه حللللللوة قوووووي
ردحذفشبابنا ..ومع كل اسف عقولهم فارغه المحتوى ..فهم يقلدون كل ما يرونه امامهم ..كالاطفال عندما يقلدون الاشياء طنا منهم انهم يفعلون الاشياء الصحيحه...
ردحذف..
انالست الموضه ولكنني ضد هذا التخلف المنقطع النظير!!!
الاسوأ من كدة كمان انتشار اللوجو الخاص بمجلة بلاي بوي اللي هي مجلة للدعارة واللوجو منتشر علي عربيات الشباب وشوفته علي تي شيرتات بنات وكمان لبس اطفال
ردحذف