اغنية كتبتها لشعبان عبد الرحيم

كان نفسي في يوم ارشح .. كان نفسي في يوم ارشح

كان نفسي في يوم ارشح واعمل عمل ايجابي انا اللي اختار مرشح ويتصلح خرابي .. ايييييييه

لو رحت ادي صوتي لمين ممكن اديه للي بيدفع فلوس ولا اللي فاتح بوفيه وايييييييه

في واحد قال مرشح وهايخدم الشباب بعديها شبابنا غرقوا وبان انه كداب وايييييييه

والتاني قال هايرفع لمصر شأنها واديه عمال بيسرق في مصر واهلها وايييييييه

والثالث بذقنه طالع وكاتب انه صالح بقي دي اعمال شيوخ ولًا اعمال مصالح وايييييييه

طب اعمل ايه يا ناس .. طب اعمل ايه يا ناس

طب اعمل ايه يا ناس طب اعمل ايه يا هوو .. مش عارف احمي حقي وحقي بيسرقوه ايييييه

عايزيننا نبقي لعبة ونكون كمان راضيين وان جينا في يوم رفضنا بيقولوا سلبيين ايييييه

لازم اروح ارشح ورأيي يزوًروه ولو مرضيتش اروح صوتي هايسرقوه ايييييه

لو حتي دخلت يوم في حزب 100 % برضه قصر الكلام هم الاغلبية ايييييه

لو يوم عايزين قرار اكيد هاينفذوه هاجيبوا كل غايب والنايم صحصحوه ايييييه

ا --------- ييييه

القبة ايه والقبة اه

من زمن نشأ مثل شعبي بيقول "فاكر ان تحت القبة شيخ" وكان القصد ان زمان الشيخ بيخطب تحت القبة علشان تركز صوته وميحتجش لميكروفون والمثل في مجمله بيستنكر اعجاب طرف بالطرف الآخر. لكن انا شايف في المثل ده تلميح سياسي يعاقب عليه القانون. قصده ايه يعني ؟ قصده ان قبة البرلمان تحتها حرامية مش شيوخ ؟ قصده ان تحت القبة ناس مش بتراعي ربنا في تعاملتها مع الناس ؟ ولا قصده ان نواب المجلس اللي اغلبهم الحزب الوطني مش شرفاء ولا عندهم امانة زي الشيوخ ؟ لا لا لا ده كلام ميصحش ابدا.

ازاي يتهم نواب المجلس اللي اغلبهم الحزب الوطني بالحقارة والانحطاط؟! وازاي يسخر من نواب المجلس اللي اغلبهم حزب وطني ويقول انهم حاجة كدة عبيطة وملهاش لازمة ؟! يعني ده ناقص يقول ان نواب المجلس اللي اغلبهم حزب وطني دول حرامية وولاد كلب! ولا ممكن يقول علي نواب المجلس اللي اغلبهم حزب وطني انهم ناهبين البلد وسارقين الشعب!. ولا يقول ان نواب المجلس اللي اغلبهم حزب وطني بيبيعوا البلد للي يدفع اكتر المهم مصلحتهم! . مش ممكن حاجة غريبة جدا !!!!

معقول نواب المجلس اللي اغلبهم حزب وطني يتقال عليهم مزورين وبينصبوا علي الشعب؟! انا مش مصدق ان نواب المجلس اللي اغلبهم حزب وطني نتهمهم بالقذارة والتلاعب باحلام الشباب وانهم بيبنوا احلامهم علي جثث الشعب! . ومكنتش اتخيل ان ييجي اليوم اللي اشوف فيه نواب المجلس اللي اغلبهم حزب وطني متهمين بتضييع هيبة مصر علي مستوي العالم ! اصل مش ممكن ان نواب المجلس اللي اغلبهم حزب وطني نتهمهم بتخريب البلد ونشر الفوضي وترسيخ نظام فاسد من اجل استمرارهم في الحكم!

وانا من هذا المنبر اناشد ان الشعب يقاطع هذا المثل المهين الذي يسئ لنواب المجلس اللي اغلبهم حزب وطني وممكن نبدله بمثل تاني واقعي و هو "انت فاكر ان تحت القبة مجلس .. لا ده في نواب المجلس اللي اغلبهم حزب وطني "

الاهتمام بالامور الداخلية

ظهر من فترة موضة او ستايل في اللبس يتطلب اظهار بعض الامور الداخلية وفي شباب بقي ماشي في الشارع مسقط بنطلونه مبرزا تلك الامور متباهياً بيها والوضع ده استفز ناس كتير لدرجة انهم عملوا جروبات علي الفيس بوك منها "ارفع بنطلونك لو سمحت ذنبي ايه اشوف اللي تحت" و"ارفع بنطلونك لاجي اقلعهولك" مهاجمين الموضة دي وبيحاولوا يفهموا الشباب سببها ومين اللي ابتكرها والغرض الحقيقي منها.

ولو اني ضد الموضة دي الا اني معجب بابداع الشباب وذوقهم في اختيار الامور الداخلية. يعني تلاقي واحد لابس بتاع مرسوم عليه كرات بيضاء وحمراء مدعياً انه عنده دم. وواحد تاني حزايني شوية فتلاقيه اسود وعليه نجوم. وفي شباب بتميل للطفولة يعني تلاقي لابس بتاع عليه جاروف بحر وشمسية زي المايوه اللي كنا بنلبسه فوق الكافولة. ومن ده كتير وكل بتاع بيوضح احساس اللي لابسه.

بناء علي الظاهرة دي وبناء علي الفكر الاستثماري فانا فكرت في مشروع رهيب ... مصنع امور داخليه بس طبعا التميز مطلوب وعلشان كدة انا هاعمل قسم لتلقي طلبات الشباب ونصمم الامور دي بالقطعة تحت الطلب. يعني مثلا شاب يبعت لي يطلب بتاع ينفع علشان الفلانتين نقوم نصمم بتاع عليه قلوب او دباديب. وواحد تاني يطلب بتاع علشان يلبسه في الاستاد نقوم نصمم له بتاع عليه حارس مرمي بينط ويمسك الكورة وده لان حارس المرمي نص الفريق. وطبعا ممكن نصمم بدل مزودة بجزء شفاف يتيح للناظرين رؤية الامور الداخلية لمرتدي البدلة وممكن نسميها بدلة مزودة بخاصية اظهار البتاع.

بس فكرت لقيت ان ممكن ناس تطلب طلبات غريبة او يعاقب عليها القانون .. وبكدة ندخل في مشاكل وحوارات ورؤساء العرب يجتمعوا ويشجبوا ويستنكروا وممكن المنظمات العالمية تنتقد الاوضاع في مصر من اضطهاد الشباب من راغبي اظهار امورهم الداخلية ويطلعوا في مظاهرات وتحصل فتنة ومرتضي منصور يرفع علي قضية ونبيه الوحش يرفع علي مرتضي منصور قضية لانه رفع علي قضيه وندخل في قلق كبير انا مش قده فتوقفت عن احلامي وقررت ابتعد عن المشاكل واخد بالمثل الشعبي ... ابعد عن ال--- وغنيله.

يا فهلوية .. ايه يالالالي

الفهلوة بقي لغة العصر وهي المهارة الوحيدة المطلوبة علشان تعيش مرتاح بس المشكلة لما كل الناس تتفهلو مش هايبقي في معني ولا تميز للفهلوة علي رأي توفيق الدقن في الشيطان يعظ "اما كل الناس هاتبقي فتوة .. امال مين اللي هاينضرب؟! " وبعدين من ساعة ما الفهلوة نزلت شعبي وبقت في ايد الكل زي الموبايلات وهي حالها مبقاش زي زمان ... ياااااه ايام الخير لما كان الفهلوي بيتقال عليه ده بيلعب بالبيضة والحجر ويبقي نصاب عظيم وبيعرف يشتًغل ناس كتير. لكن الصيني من الفهلوة تلاقيه عبيط وغبي غباء مباشر.

يعني لما اروح لفكهاني واقول له كيلو موز يا ريس يقوم يدخل في تجربة فاشلة من الفهلوة ويقول لي ايه 2 كيلو يا استاذ قمت عامل عبيط وقلت له لا يا ريس كيلو واحد بس قال لي طيب .. قطع ووزن فلقيته بيقول لي بقول لك يا باشا طلعوا كيلو ونص تمام ؟؟ انا طبعا حسيت بسيول السذاجة بتمطر علي من عينيه وسرحت للحظات وقلت لنفسي يعني هو الفكهاني اللي اغلب شغلته انه يوزن اتلخبط وطلع غصب عنه وبكل دقة نص كيلو زيادة وبعدين هو منتظر مني ايه اقول له .. ياه يا ريس دي اشارة من ربنا اني لازم اخد كيلو ونص يلَا علي البركة!! حاجة تحرق الدم.

ولما سواق نص نقل نتفق معاه علي الطريق والحمولة والاجرة وييجي لما نوصل يبدأ بكل محبة يساعد في التخلص من الحمولة وتيجي تحاسبه تلاقيه يدخل هو كمان في تجربة فهلوية هابطة الآداء ويقول انه مش عاجبه  الحساب ده بالرغم من ان دي الاجرة المتفق عليها وبتكون الحجج عبيطة قوي يعني يقول اصل مكنتش فاكر ان السكة طويلة كدة .. اللهم اجعله خير السكة طولت عن ما كان متخيل حتي لو حصل دي مشكلة خياله المحدود ما هو اكيد المحافظة مش هاتلحق تطول السكة واحنا ماشيين فيها وسبب تاني يقول اصلي نزلت معاكم الحمولة وكنت ممكن اسيبكم تنزلوها لوحدكم .. يعني هو كان حد توسل اليك تنزل معانا وبعدين انت عملت كدة علشان تمشي بسرعة مش اكتر .. و في كل المحاولات دي بيستخدم سيف الحياء ضد الزبون بانه يفضل يزِن علشان تتكسف وتنجز في الوقت اللي هايضيعه لو فضلت تفاصل معاه –مع انه موضوع منتهي من اساسه- وبرضه علشان تتقي شر الفضيحة اللي هايعملها لو مخدش الاجرة اللي هو عايزها وعلي فكرة مهما زودت ليه في الاجرة مش هايرضي. 

وغير النماذج دي في نماذج كتير جدا حوالينا لمحاولات فاشلة للفهلوة اللي فعلاً هيبتها راحت وحالها بقي لا يسر متفهلِو ولا متفهلَو عليه والبيضة والحجر اختفوا ودلوقتي البيضة بقت مصنوعة من الحجر تبقي ايه المهارة في اللعب بيها ؟؟

كل واحد يمسك اللاسلكي بتاعه بقي

اكتر من مرة يحصل لي موقف مش ولا بد ومع جهات مش من النوع اللي ينفع يتعمل معاها اي موقف خالص. يعني اتذكر مرة كنت رايح القلعة وبعد ما عديت من البوابة لقيت واحد عادي خالص بيقول لي بطاقتك قلت له ليه قال لي معاك ولا مش معاك رديت بكل قوة معايا بس مش بطلعها لاي حد لقيت واحد جاي من وراه وماسك لاسلكي (مما يدل انه اللهم احفظنا) وبيقول له في حاجة يا ابراهيم فبص لي قلت له البطاقة اهي يا استاذ ابراهيم .. البوكس منين؟؟

مرة تانية كنت راكب من التحرير ميكروباص هرم وطبعا كعادة السواقين بيقسموا الطريق علي كيف كيفهم فكان رايح لحد الطالبية .. انا ماليش دعوة انا نازل الطالبية و فجأة جي من الشباك واحد سألني عريش (محطة بعد الطالبية) قلت له لا قال لي لا رايح عريش وركب ولما ركب لقيت معاه لاسلكي قلت له والله السواق اللي قال طالبية بس.

المرة الثالثة كنت في المترو واثناء مروري من البوابة (الماكينة كما نطلق عليها) بتذكرتي جي واحد وحاول يعدي معايا .. انا متعود ان الاشكال دي بتعامل معاها بكل قسوة لاني بعتبره بيسرقني ويستغفلني ويضربني علي قفايا قمت شادد البوابة بعد ما عديت لقيته ماسك فقمت شادد قام هو كمان شادد وهو يشد وانا اشد فاتعصبت وقلت له ايه في ايه قال لي انا اشتراك قلت له وانا مالي ما تطلع الاشتراك فلقيته مستغرب وبيأكد علي انا اشتراك قلتله برضه وانا مالي لقيت واحد جاي من وراه وماسك اللاسلكي اياه وبيقول له في ايه قمت رجعت وعديته وكنت في قمة سعادتي وهو بيسرقني ويستغلني.
وعلشان كدة انا اناشد وزارة الداخلية انهم يطلبوا بكل هدوء ومودة ومحبة من الضباط اللي مش لابسين الزي الرسمي انهم يمسكوا اللاسلكي بتاعهم او يعلقوه في رقبتهم لان مش كل مرة تسلم الجرة.

كله سخافة وعبط وجنون بيضر تمام زي الشيشة

لما الانسان بيحس بفراغ بيحاول انه يتخلص من الفراغ او يخرج منه . احد الوسائل اللي كنت فاكرها مفيدة للخروج من الفراغ هي التليفزيون (التلفاز بالفصحي) ولما اشتريت فراغ حلو كدة ومن النوع الكبير لجأت للتليفزيون وكانت الصدمة. مجموعة ناس سخيفة بتستظرف وبتستخف وفيما بعد اكتشفت اني المفروض اضحك لان ده عمل كوميدي فبعت للقنوات دي علشان يعملوا تنبيه قبل العرض انه "عمل كوميدي برجاء الضحك" ويستحب انهم يراعوا كبار السن والمرضي ويكتبوا "البرنامج يحتوي علي مشاهد قد تصيبك بانسداد الشرايين" ويا ريت لو يراعوا الاطفال بجملة "برجاء ابعاد الاطفال اقل من 12 سنة والا سيصابوا بالتخلف العقلي". اما بالنسبة لقنوات الافلام .. ثلاث قنوات عليهم فيلم ابو علي في نفس الوقت واللي بالي بالك جي ثلاث مرات علي نفس القناة في يومين. قلت خلاص اشوف الاجنبي بيقولوا عليه كويس وفعلا فضلت اتفرج يوم ويومين واسبوع واسبوعين وبعد كدة حسيت ان في افلام كتير جدا بتتكرر وبدأت احول واتفرج علي الحتت اللي عاجباني في الفيلم .. لكن عمليا انا كدة مش بتسلي .. انا كدة براجع الافلام علشان لو حد امتحني فيها فشعرت باتساع الفراغ عن ما اشتريته ما هو هو الفراغ كدة زي الكوتشي .. بيريح مع اللبس.

بعيدا عن كل اللي حصل ده في حاجات غريبة بدأت احس بيها منها العبودية يعني بتوع القنوات دول بيتحكموا في جداً هم اللي بيختاروا الوقت اللي يناسبهم علشان يفرجوني علي الفيلم ده طبعا غير الاعلانات اللي بتطلع في النص زي اخو خطيبتك .. سخيف وغلس وبيفصلك ومجبر انه يبقي موجود.

الشعور الثاني التحول .. وده بيكون حسب الميول الشخصية في ناس بتتحول لجزرة مالهاش اي ايد ولا رجل ولا بيتعمل بيها حاجة غير انها تتقطع وناس تانية بتتحول لحمير ودان طويلة وبوذ ممدود وذيل وبيبقي ناقص بس البردعة. الشعور الثالث هو الهبوط .. يعني الواحد بيهبًط كدة ويبقي كسلان لانه بيقعد بالساعات اقصي تمرين ومجهود عضلي بيكون من نصيب الصوابع وبالاخص الابهام واحياناً الابهام بيحس بارهاق فبيشغل السبابة ولايد واحدة كمان.

الله يرحمك يا سعاد يا حسني لما كنتي بتقول عليه كله ثقافة وعلوم وفنون .. معرفش وجهة النظر دي كان مصدرها ايه؟

التنمية البشرية المعاصرة

من كام سنة كدة ظهر اختراع اسمه التنمية البشرية وقعدت فترة الناس تتعلمها لحد ما الموضوع اتفحت واتردم زحليون مرة وتحول بمرور الزمن الي سبوبة واكل عيش بيسترزق من وراه ناس كتير من اللي بيلبسوا بدل ويتحطوا علي بوستر طويل ويتكتب جنبه "المدرب المعتمد في التنمية البشرية" علي غرار بتوع الدروس الخصوصية "امبراطور الكيمياء" و "برنس الفيزياء" و "لول الرياضة"

انا مش معترض علي فكرة التنمية البشرية لكني معترض علي ان كل من هب و دب بقي يعمِل فيها مدرب عالمي وبقت زي ما بيقولوا شغلانة اللي مالوش شغلانة يعني اي حد لسانه حلو وقرأ له كتابين لمؤلفين محترمين بقي مدرب عالمي مع انه لا درس علم نفس ولا ليه خبرة ولا مر عليه موقف من اللي بيحكيهم. وبم ان كل الناس لابسة وش التنمية البشرية فيبقي انا كمان من حقي ادوس في السكة دي وعلي البركة

الكورس العظيم بتاعي هايكون بسيط وسريع ومن الآخر هاكتب العنوان وبجمله اشرح الكورس

Team Work  : كل واحد في الفريق يلم نفسه وميفتكرش انه هايوصل لحاجة بدون بقية اعضاء فريق.

Communication Skills : خليك مؤدب مع خلق الله .. اسمعهم .. احترمهم .. كلمهم كويس .. عاملهم بدماغهم.

Self Confidence : ما دام خططت ودرست قبل ما تنفذ .. يبقي تخاف من ايه يا اهبل.

Time Management : رتب اولوياتك وانجز بلاش لكاعة.

Presentation Skills : اعمل نفسك فاهم وكدة كدة اللي قدامك عامل نفسه بيسمع ولو سأل حاول تجاوب منفعش فسًحٌه.

Self Motivation : متبقاش زي العربية العطلانة .. مستني حد يزق .. العربية دي محدش بيحترمها ابداً وبيهربوا من زقها.

Leadership : علشان تبقي ريس .. لازم ماتتمريِسش .. وخليك الحضن الحنين.

وبعد قراءة الموضوع ده بيكون القاريء مؤهل انه يدِي كورسات تنمية بشرية ويحط صورته علي بوستر طويل بس علي فكرة في مهارات تانية كتير جدا .. بس هم دول اللي وصلوا السوق المصري.