كان واحد مننا - ولا اقصد بالتعريف ده اي اسقاط سياسي – ماشي في طريق طويل وفضل ماشي لحد ما وصل لمفترق طرق عبارة عن 4 اتجاهات فاحتار ومعرفش يروح فين لكنه شاف راجل طيب – ومحدش يسأل هو ليه طيب هي القصص كدة لازم يبقي فيها حد كبير وطيب وحكيم - قاعد علي جنب وكان الحوار كالاتي
اللي مننا : لو سمحت هي الطرق دي بتودي علي فين ؟
الحكيم : الطريق الاول ده بيودي لبحيرة الموت .. و دي عبارة عن بحيرة المياة بتاعتها حمضية وبتغلي.
اللي مننا : تمام .. طيب الطريق التاني؟
الحكيم : كهف الهلاك .. وده عبارة عن كهف مظلم اللي بيدخله بيخرج هيكله العظمي بعد يومين بس محدش عارف بالضبط ايه اللي جوه.
اللي مننا : يا سيدي دي تفاصيل لا تودي ولا تجيب .. طيب الطريق الثالث؟
الحكيم : متاهة الضياع .. ودي عبارة عن طرق متشابكة اللي بيدخل بيفضل يتوه فيها لحد مايموت من الجوع.
اللي مننا : لا دي حاجة هايلة .. طيب اخر طريق ده بيودي علي فين؟
الحكيم : غابة الخوازيق ودي اللي بيدخلها بيت...
اللي مننا (يقاطعه في الكلام) : خلاص انا متخيل .. بس قول لي انت عرفت الحاجات دي منين؟
الحكيم : مش مهم دلوقتي عرفت ازاي بس المهم نقرر هانمشي في انهي طريق علشان في 3 ديناصورات مفترسة جاية وراك
ليست هناك تعليقات:
إرسال تعليق