ما تنط يا استاذ

القفز هي من القدرات اللي ربنا رزق بيها كائنات زي الضفدعة والبرغوت والقرد بس مش عارف ليه في ناس مصرين علي ان الانسان يكتسب القدرة دي يعني لما تيجي تركب ميكروباص فانت محتاج تقفز وبتبقي مطالب بقفزة اقوي اذا كان المواصلة اتوبيس وطبعا اذا كنت قفزت وانت بتطلع يبقي اكيد مش هايركن ويوقف المحركات وانت نازل بس فنيا بتختلف قفزة الصعود عن قفزة النزول

في قفزة الصعود بتحاول تطلع بسرعة والدافع بيكون عربية جاية وراك ولو ملحقش تقفز هايكون مصيرك زي مصير السحلية علي الطريق السريع ونظرا للعدد المهول للسيارات فغالبا هاتعاني من عدة خبطات وهاتفضل زي الكورة المطاط لحد ما حظك يطلع كويس وعربية تخبطه بزاوية ترميك علي الرصيف او حظك يبقي كويس وتقع قدام واحد ابن ناس يخاف يخبطك علشان المشاكل والسين والجيم فيفاديك بس ماتضمنش ان اللي بعديه يكون ابن ناس وممكن ربنا يرزقك – حسن الخاتمة – بواحد ابن حلال يقف علشان ميخبطكش ويتلقي بالنيابة عنك الخبط بسيارته بس صدقني ساعتها احسن لك تموت لانه لما عربيته هاتتدمر بالنيابة عنك معرفش ممكن يعمل فيك ايه.

اما النزول فبيبقي الدافع سلبي يعني بيمنعك من القفز لان طبعا سائق المركبة اللي هاتقفز منها مش هايركن علشان سبب تافه (اللي هو علشان ينزلك) هو صحيح ممكن يكسر علي كل العربيات وييجي من الشمال لليمين باقصي سرعة علشان يركب زبون بس ده مش مبرر انه يركن علشان ينزلك.و بتبدأ لحظات الترقب والاستعداد للقفز وهنا في نصائح احب اقولها ليك

اولا : لا تنصت للاصوات المحبطة

نداءات التباع والسائق اللي هايفضلوا يلحوا عليك بالنزول مرددين "الطريق اهو فاضي" بالرغم من ان اللي نزل قبلك اتخبط من 9 عربيات خلال ال 15 ثانية منذ نزوله حتي لحظة الحاح التباع والسائق.

ثانيا : القرار الصحيح مقيد بزمن

لازم تختار الوقت المناسب للقفز وده بيكون من خلال عملية حسابية بتكون عناصرها سرعة المركبة ,المسافة بين المركبة واقرب رصيف, سرعة المركبات القادمة من الخلف, وزن وحجم الاسفار المحمولة, واخيرا سرعتك في عملية العبور والتي يتم تحديدها بالخبرة من مواقف مشابهة زي السباقات اللي كنت بتعملها وانت صغير في شارع طويل او لعبك للكورة في ملعب بيشيل 11 وكنت بتلعبوا فيه 3 ب3

ثالثا : ثق في نفسك وخلي ايمانك بربنا كبير

الاعمار بيد الله هو شعارك وقل لن يصيبنا الا ما كتب الله لنا تملا قلبك والشهادة تتردد علي لسانك حتي تعرف مصيرك فان مت فليرحمك الله وان لم تمت فاحمد الله واعلم ان اجلك لم يكن في  تلك المركبة.

وبكدة نكون وضحنا الفرق بين قفزة الصعود وقفزة النزول وعلي فكرة القفز المستمر ده كان من الاسباب القوية اللي منحتني القوة لقفزة الثقة من ارتفاع 10 متر اثناء استعدادي للتقدم للكلية الفنية العسكرية اللي اترفضت منها واحنا لو حللنا قفزة الثقة هانلاقيها قفزة آمنة للغاية يعني انت بتقفز من 10 متر في مياه عارف تحتيك ايه ومتأكد ان مفيش مثلا رخ هايعدي ويخبطك او تلاقي سمكة قرش بتشتمك لانك عديت قدامها ده غير انك لو حصل لك حاجة هاتلاقي منقذ ينزل لك علي طول مش بعدها ب 45 دقيقة لان الطريق واقف.