عن مصر الطرية

انت مؤيد لحزب إيه ؟ السؤال ده إجابتي عليه بتكون بمثابة إشارة الانطلاق في السخرية والتهكم فكل ما أقول أنا مؤيد لحزب مصر القوية تبدأ وصلة من الافيهات المنتشرة علي الفيس بوك والتويتر والنكت اللطيفة واللي بعد ما بتنتهي مباشرة بتبدأ وصلة مختلفة من الشتائم مع قليل من النقد السياسي القابل للنقاش. تقبلي للسخرية مش ﻷني مقتنع بمحتوي التريقة وإلا كنت أنا كمان هاجمت الحزب لكن لأن النقد عادة بيكون نوعين، نوع موضوعي وده قابل للنقاش والرد عليه وبيكون حوار ناضج، والنوع التاني تريقة غير موضوعية من أجل التقليل وصاحبها بيكون مكون رأي نهائي ومش بيطرح التريقة لفتح حوار إنما لإحراج الطرف التاني وبم إن الكلام ده مايتردش عليه وبم إني مش بحس بأي إحراج -طالما مقتنع بالرأي- فبشارك مع الأخ الساخر في التريقة وأمده بالمزيد من الافيهات من باب مساعدة الآخرين في الترفيه عن نفسهم.

بس بالنسبة للناس اللي بتسخر من الحزب وبتقول عليه مصر الطرية ومصر الرمادية وحزب أبو الفتوح .. هل الناس دي متابعة للحزب ؟ هل هم متابعين مواقفه ؟ هل متابعين بيانات الحزب ؟

هل ﻻحظوا إن في الوقت اللي تلخص فيه رأي أغلب المعارضين للإعلان الدستوري في "لا للإعلان الدستوري" كان الحزب بيعرض بالتفصيل رأيه في كل نقطة في الإعلان مع رفض المواد اللي بتخدم مصلحة فصيل بعينه والموافقة علي البنود اللي بتحقق مصالح الثورة مع طرح آليات بديلة للوصول لنفس النتيجة بشكل مؤسسي ؟

هل لاحظوا إن في الوقت اللي معارضة الدستور تلخصت في "لا لدستور الإخوان" كان في ورش عمل بتتم داخل مقار الحزب في كل المحافظات لدراسة الدستور وفي النهاية تم عرض المواد المرفوضة وطرح صيغ بديلة لها ولما تم تجاهل الرأي ده في ظل لعبة إخوان ومش إخوان قرر إنه يرفض الدستور لوجود عوار فيه ؟

هل ﻻحظوا إن في الوقت اللي بيتكلم فيه الكثير عن العيش والحرية والعدالة الاجتماعية كان الحزب بيتضامن مع المطالبين بحقوقهم في المصالح المختلفة زي إضراب الأطباء وزي عمال السكة الحديد حالياً ؟

هل ﻻحظوا إن في الوقت اللي الأحزاب اللي الناس بتعتبرها ثورية (مش طرية) كانت بتاخد قراراتها من القيادات بدون استشارة القواعد كان الحزب بيبعت لكل الأعضاء ﻹستشارتهم بخصوص كل خطوة يخطوها الحزب ؟

هل ﻻحظوا إن في الوقت اللي ماسمعناش عن انتخابات في الأحزاب اللي مش طرية كان الحزب بيعمل انتخابات في كل مقاره في مصر وأغلب اللي كسبوا شباب ؟

كل المشكلة إن البعض قرروا إن السياسة تبقي زي الثورة إما مع إما ضد ورغم إن ده قرارهم هم وخدوه مع نفسهم إلا إنهم قرروا يفرضوه علي كل العاملين في السياسة وبالتالي بقي ﻻزم أي حزب إنه يعلن ولاؤه لطرف من طرفي الصراع ولو حاول يبقي له رأي مستقل ساعتها هايتعرض لسيل من الشتائم والسخرية ويكون طري. مش بقول إن حزب مصر القوية مثالي وﻻ إني موافق علي كل قرارات الحزب لأن مش طبيعي أصلاً وجود حزب كل اللي فيه موافقين علي كل قراراته وبمجرد ما الواحد يختلف في قرار وﻻ اتنين يقوم واخد اللي مختلفين زييه ويروح يعمل حزب.

ممكن تتريقوا علي الحزب وتقولوا عليه اللي انتوا عايزينه وفي النهاية الزمن هو اللي هايظهر مين اللي بيعارض لمصلحة حزبية واللي بيعارض لمصلحة بلد، وهايظهر مين اللي ماشي مع الموجة علشان ياخد صك النضال والثورية ومين اللي له رأي مستقل ورؤية تعبر عن شخصيته مهما كلفه الأمر .. باختصار اللي عايزين يشتموا يشتموا .. خليهم يتسلوا أو اقول لهم حاجة أحسن .. تابعوا صفحة الحزب واعرفوه عن قرب .. وأهو لو لقيتوه يستحق التريقة ساعتها هاتعرفوا تطلعوا عليه افيهات أقوي وأخف من الافيه المستهلك .. مصر الطرية