مش عارف ليه الافلام الاجنبي – اللي هي الامريكاني- رسخت في دماغنا اننا عايشين حياة مملة وان الحياة عندهم روشة وفيها حيوية يعني هم عندهم سوبر مان وسبايدر مان وبات مان. ليه كل المانات (جمع مان بالمصري) دي موجودة عندهم بس يعني عمرنا ما عملنا فيلم ان في راجل بيطير بينقذ القطارات قبل ما تتقلب ولا رجل خفي بيمنع تزوير الانتخابات ولا رجل خارق بيحمي متظاهرين من ضرب الامن فيا تري ايه السبب؟ .
يعني البلد دي ماجابتش مانات ولا مثلا ممكن يكون المانات اللي عند امريكا دي اصلا من عندنا بس مستحملتش العيشة في مصر وقدمت علي هجرة لامريكا فبالتالي تكتلوا هناك يعني ممكن يكون سبيدر مان ده اصلاً من بولاق الدكرور ولما كبر ملقاش شغلانة غير انه يرمي اللزق بتاعه ده علي حيطة الاوضه بتاعته وانه يعرف ياخد ب 2 جنيه عيش بدون ما يقف في الطابور فحس انه مضيع مواهبه وانه يستحق احسن من كدة وقرر يسيب بلده ويروح بلد تقدَره.
ويمكن سوبر مان ده كان من امبابة ولما عرض خدماته علي الحكومة بانه يطارد الاشرار الحكومة خافت علي نفسها فعرضوا عليه انه يقوم بمشروع شباب الخريجين وانه يوصَل الناس وهو طاير بحيث ان الزحمة تخف واهو يبقي انجاز عظيم للحكومة .. لكن سوبر مان مستحملش وراح كوكب تاني خالص لحد ما جاله العرض بتاع امريكا فنزل هناك.
ولما بسرح بخيالي وافكر بتمني اني اكون في يوم سوبر مان .. مش علشان ابقي خارق او اني اطير .. لكن علشان اخرج من البلد دي
leih el ka2aba di yabny
ردحذف