مالهاش حل تاني

مرة واحد صاحبنا كان نايم -وده مش شيء مميز طبعا- وكلنا نقدر نتوقع انه بعد ما ينام هايصحي لكن لما صحي من النوم حس بانه مش عايز يقوم وبدأ الحوار بينه وبين نفسه

صاحبنا : يا ده انا صحيت

نفسه : يلا بقي مدام صحيت يبقي تقوم من السرير

صاحبنا : اقوم ؟! بس اقوم ليه؟

نفسه : قوم شوف يوم جديد يتعمل فيه حاجات كتير

صاحبنا : اه صح لازم اعمل ... اعمل؟! اعمل ايه؟ انا فاضي ومفيش حاجة مستنياني اعملها ولا انا مستني حاجة

نفسه : طيب ما تقوم تعمل حاجة علشان بكرة تستناك او انت تستناها

صاحبنا : طيب ما انا حاولت مرة واتنين و 100 كمان ومنفعش. هاقوم اعمل حاجة يبقي مصيرها زي ال 100 اللي فاتوا

نفسه : طب مش ممكن المرة 101 تنفع

صاحبنا : ممكن برده .. (يرجع ينام تاني)

نفسه (تزعق لصاحبنا) : انت هاتنام ! ايه خلاص مفيش دم مفيش احساس

صاحبنا : لا في بس المشكلة ان مفيش فايدة

نفسه : طيب انت هاتنام قد ايه؟ يوم يومين سنة هاتنام لحد امتي؟؟

صاحبنا : لحد ما اموت وارتاح

نفسه : انت اصلا ميت

صاحبنا : يا خبر اسود يعني انا في التربة دلوقتي

نفسه : يا الله علي الغباء ده تعبير مجازي يا جاهل انت ميت مدام بطلت تعمل اي حاجة .. ما دام اخترت كدة خلاص براحتك

صاحبنا : طيب يعني انت شايف ان المرة ال 101 هاتمشي ؟

نفسه : ممكن .. وممكن لا

صاحبنا : شوفت بقي الالش علي الصبح يعني هي قلة مزاج وخلاص اقوم اتفحت وبعدين استني اما اني انجح او اني اتهطل

نفسه : بس حتي كون انك ماتعرفش هاتنجح ولا لا ده شيء ممتع

صاحبنا : هي وجهة نظر .. ولو انها حاجة تشل بس فكرة برضه .. يعني انت شايف اني اقوم؟

نفسه : تصدق انك ممل الله يخرب بيت ..

صاحبنا : خلاص خلاص من غير شتيمة هاقوم واحاول المرة ال 101 ولو منفعتش

نفسه : ايوة ؟

صاحبنا : هاحاول المرة ال 102