احنا بتوع الحظر: حلقة 8 (الأخيرة)

الليلة دي مقدرناش ننام من الزحمة في الأوضة ومن الريحة في نفس الوقت ده غير الواد المبرشم اللي يحسسك بالقلق طول ما أنت موجود معاه في مكان واحد.. الصبح دخل عسكري وخدنا لعربية الترحيلات قام الواد أبو تي شيرت سبونج بوب قعد يعيط ويقول والله مظلوم والله مظلوم وكان واضح عليه التأثر بالأفلام العربي الهابطة وآدء تامر حسني لما بيمثل إنه بينهار.. الراجل السوري قال: بشار إيفري وير.. قلت لابن خالتي: مكنش له ﻻزمة أم المشوار ده خالص.. ابن خالتي قال لي: مكنش له ﻻزمة تزعق في أم الضابط.. المبرشم قال: تعالي كدة شوية يا كابتن عشان أخوك محصور وعايز يفك ميه

عربية الترحيلات مشيت بينا لحد ما وصلنا لمبني وسط عماير وناس رايحة وناس جاية واللي أول ما شوفتهم قلت لنفسي: أهو أنا كنت زي الناس دي امبارح بس. نزلنا من العربية وطلعنا في نفس الطابور لحد ما وقفنا علي باب مكتب وكيل النيابة ودخلونا واحد ورا التاني.. الواد بتاع سبونج بوب خرج يقول: أنا؟ بقي أنا بضرب الجيش؟ ده أنا حتي متصور مع عساكر كتير يوم 30 يونيو. السوري خرج يقول: يعني أنا هسيب بيتي وملكي واغترب واشقي في بلاد غريبة عن وطني علشان اسقط نظام الحكم عندهم؟ طب ما كنت اسقطه عندنا. المبرشم خرج من عند وكيل النيابة يقول: ده باينه ضابط مصطبح وﻻ إيه.

الصراحة مكنتش عارف هم اتقال لهم إيه جوة بس لما دخلت عرفت. وكيل النيابة قال لي وهو زهقان مما يدل علي تكرار نفس الكلام كتير قبل كدة: التهم المنسوبة إليك الاعتداء علي القوات المسلحة وحرق المقار الشرطية والانتماء لجماعة ارهابية واستخدام السلاح لقتل الأبرياء وتدمير مساجد وسرقة سيارة بالإكراه والتخابر مع دولة أجنبية.. المهم قعد بتاع ربع ساعة يقول في تهم وبعد ما خلص قال لي: ما قولك فيما هو منسوب إليك؟ أنا قعدت ربع ساعة برضه علشان استوعب بعد كدة قلت له: تاني معلش علشان نسيت.. كنت فاكر إنه هيعمل حاجة من الاتنين إما إنه يشتمني أو إنه يعيد الكلام تاني لكنه في الحقيقة عمل حاجة تالتة خالص ولقيته بيقول: وقد أنكر المتهم جميع التهم المنسوبة إليه.. تعالي امضي علي أقوالك

طلعت وأنا مصدوم فلقيت ابن خالتي معاه محامي.. بصيت له وقلت: ده جبته إزاي ده؟ قال لي: وأنت جوة لقيت عسكري جاي بيقول لي مش عيايز تعمل مكالمة؟ قلت له بس أنا مش معايا فلوس قال لي مش مشكلة لما أهلك ييجوا ابقي خد منهم واديني.. واضح إنه بيعمل كدة كتير. بعد ما دخل مع المحامي خرج مبسوط وبعد كدة اتنده علي تاني ودخلت وخرجت مبسوط.. الصراحة تدخل المحامي والوسايط اللي جابهالنا خلصت الموضوع وخدنا اخلاء سبيل لعدم وجود أدلة.. مع إننا كان ممكن نتحبس ونشيل قضية وبرضه مفيش أدلة

لما خرجنا عرفنا إن الونش خد العربية من الكمين فقلت لما أروح واستحمي وأنام ابقي أروح أخدها.. أول ما روحت لقيت أبويا بيقول لي: أمك كلمتك 100 مرة ابقي كلمها علشان دي ناوية تقتلك.. كنت عايز أقول له: هو حضرتك مش مستغرب من إني مرجعتش امبارح وراجع دلوقتي مبهدل؟ بس بصراحة مكنش في حيل للكلام.. دخلت خدت دش وبعدي ابن خالتي واديته هدوم نضيفة علشان يروح لكنه نام بيها علي الأرض.. نمت أنا كمان وصحيت علي صوت أمي بتصحيني وهي بتزعق: تصدق إنك معندكش دم.. مش بترد علي موبايلك وكل ما اتصل بيك أبوك يقول لي لسة مجاش ودلوقتي نايم؟ يعني آجي بتاكسي من عند خالتك علشان سيادتك  معندكش دم؟
 بصيت لها وقلت: معلش يا ماما حصل لي موقف امبارح صعب شوية ردت علي: موقف إيه ده.. المهم اعمل حسابك الجمعة اللي جاية أنا وخالتك نازلين المول تاني علشان في حاجات عايزين نرجعها.. في اللحظة دي لقيت ابن خالتي صحي فجأة من النوم ووقف يصرخ وطلع يجري من باب الشقة وهو بيقول ﻷاااااااااا ونسي يلبس بنطلونه.. أما أنا فقعدت أغني: تسلم الأيادي.. والأيام بتجري.. والله لسة بدري والله يا جيش بلادي

تمت