الباب الثاني : المشروبات
المشروبات الشعبية الاكثر شهرة هي الشاي بس مش اي شاي ... برجاء الابتعاد عن الشاي اللي بفتلة في فنجان ومن اجود انواع البتاع في العالم والمنتقي من خيرة اشجار مش عارف ايه اللي بتطلع فين. الشاي الشعبي الصح هو شاي التموين اللي متعبي في كيس اخضر ومكتوب عليه شاي سريلانكي فاخر و اول ما تفتح الكيس تلاقي دخان بريحة غريبة طالع عليك و حباية الشاي مميزة شبه الفحم المطحون او ورق محروق يعني في المنطقة دي من الشبه. لما تحب تعمل شاي التموين صح فانت لازم تشربه كشري (يعني تحط الشاي في الكوب وتصب عليه المياه المغلية) لان ده بيضمن ليك الطعم الشعبي المتميز بالمرارة والقرف. لما هاتصب المياه المغلية هايظهر اللون المميز للشاي الشعبي اللي هو لون اسود داكن ... وهنا تيجي مرحلة التحلية.
في مرحلة التحلية مهما حطيت من السكر الابيض النظيف المنقي لاخر حبيبة مش هاتوصل لنتيجة ايجابية لان زي ما المثل بيقول لا يفل الحديد الا الحديد فبالمثل لا يحلي شاي التموين الا سكر التموين. سكر التموين برضه ليه مواصفات قياسية الواجب توافرها علشان يتباع شعبي. السكر لازم يبقي اصفر مايل للبني والحبيبات مختلفة المقاس واحيانا بيكون متوفر علي هيئة كتل داخل الكيس بسبب الرطوبة او العرق ولما بيدوب في الشاي بتظهر حاجات لونها ابيض او رغاوي عايمة علي وش الكوباية وبكدة يبقي شاي شعبي جاهز للشرب ولكن حتي الشرب ليه مراسم واساليب وتقنيات لازم تتبعها علشان تبقي شعبي.
في شرب الشاي بيكون سخن جدا وبالتالي لازم يتمسك بطريقة معينة من خلال وضع السبابة والوسطي اسفل والابهام اعلي الكوباية. الشرب مش بيتم من خلال اسغلال الجاذبية بان الواحد يميل الكوباية ناحيته ... لا بيتم عن طريق فرق الضغط من خلال مد البوذ للامام والشفط بقوة بحيث كل اللي واقف حواليك (علي مسافة 16 متر) يسمع صوت الشفطة. خط النهاية او نهاية الكوباية بتتعرف من خلال وصول التفل بتاع الشاي لحد الزور وحدوث شرقة بسيطة بتتبلع بكوباية مياه من الحنفيه.
انتظروا الباب الثالث من دليل ولاد الناس لكي يصبحوا اولاد بلد
!!!!! .... :)
ردحذفيييييييس أخيرا عرفت ليه هما في الأفلام العربي بيعملوا صوت وهما بيشربوا .. أنا كنت فاكرهم عندهم عيب خلقي ولا حاجه.
ردحذفههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
ردحذف