الباب الثالث : السكن
لما تكون ساكن في حتة فخمة قدامها شارع متسفلت وتحت بيتكم سوبر ماركت و اقصي فوضي ممكن تحصل هي ان تكييف الجيران بينقط علي تكييفكم ومتلاقيش ركنة تحت البيت ... يبقي انت كدة بعدت خالص عن مفهوم سكن ولاد البلد. ولاد البلد بيسكنوا في مناطق متميزة بعدة امور واهم ميزة هي انك قبل ما تقف في البلكونة لازم تتنحنح علشان لو حد من جيرانكم قاعد براحته ولا حاجة ومن طبيعة المجاري انها تطفح بشكل مستمر وتكون بحيرات تفرض علي سكان المنطقة انهم يتعلموا باليه بحيرة القرف علشان يعرفوا يعبروها اما عن الشارع فهو بيتكون من نوع فريد من المطبات الكعبورية اللي بتحس احساس الناقة وانت ماشي عليها. تحت البيت فبيكون محل بقالة عم مش عارف مين او محل حلاقة ابراهيم النجم او لو حظك مش ولا بد هاتكون فوق ورشة ميكانيكي واللي هايمتعك بمجموعة من اجمل مقطوعاته الموسيقيه علي انغام الصاج.
علشان تقدر تقول انك في منطقة ولاد بلد يبقي لازم يعدي تحت بيتكم ما لا يقل عن 12تكتك في اليوم من اللي بيشغلوا اغاني الادمان والمخدرات زي شارب سيجارة بني وشارب 3 ستلا وحجرين علي الشيشة ... الاغاني اللي بتعمر الدماغ ولما تسمعها تحس انك عايز تكح. المنطقة بتاعة ولاد البلد هي اللي عمرك ما تحس فيها بالوحدة لانك حتي لو لوحدك في الشقة فانت سامع الجيران اللي جنبكم وهم بيتغدوا وتليفزيون اللي قدامكم وكاسيت اللي تحتيكم وحمام اللي فوقيكم ... وهي دي المشاركة في الحلوة والمقرفة.
منطقة ولاد البلد ممكن جدا تقطع المياه فيها اسبوع وتضطر تملأ مياه من حنفية الجامع او الحنفية العمومية (لانهم بيعتمدوا علي الطلمبات اللي دقينها في الارض) مع ان قبل ما المياه تقطع في مصر الجديدة بينزل اعلان في شريط الاخبار ويعتذروا لقطعها مدة 12 دقيقة ونص والغريب ان بعد ده كله بيجيلك وصل المياه ويقولوا لك لو مدفعتش هانقطع المياه !!!. وتقدر تعرف انك في منطقة ولاد بلد لما تقرأ في الجرنال انهم هايخفضوا الاستهلاك بانهم يقطعوا الكهرباء لمدة ساعة مع انها بتقطع عندكم 4 ساعات بعد كدة تيجي ساعة وتقطع تاني.
في منطقة ولاد البلد انت مش محتاج تكون بتتفرج علي ماتش الاهلي علشان تعرف انه جاب جون ومش محتاج تتفرج علي استوديو التحليل لانك هاتسمعه من الشباب اللي واقفين تحت بيتك لكنك هاتحتاج فلتر علي ودانك علشان متسمعش قاموس الشتائم اللي هايتقال عن كل لاعب حتي لو لعب كويس.
انتظروا الباب الرابع من دليل ولاد الناس لكي يصبحوا اولاد بلد
mana ba2olak men sanatein en enta teseebak men el chemical engineering we teshta3'al fel karikateir wel 7agat di
ردحذف