من اكثر الامور المريحة اللي في بلدنا هي انك بتبقي عارف اللي هايحصل خلال ال 50 سنة القادمة ومين هايمسك ايه وهايحصل فينا ايه والبلد هاتبقي فين. ومن الامور المعروفة دي هي ان الرئيس القادم هو جمال مبارك وده شيء جميل جدا وانا سعيد من قلبي بالوضع ده وانا شايف ان جمال مبارك هو الانسب واللي مش مصدق انا هاثبت ليه. جمال مبارك متربي في بيت رئيس الجمهورية يعني حاسس بمشاكل الشعب وهمومه لان اكيد باباه كان بيحكيها له وهم بيفطروا في حديقة القصر واكيد وهم بيتمشوا عند البسين كان بيحكي له قد ايه الشعب ده مسكين ومحتاج حتة اوضة تلمه علشان يعيش فيها واكيد وهم بيتغدوا جوه القصر في غرفة الطعام اكيد كان بيحكي له قد ايه الشعب ده مسكين وبياكل اسوأ انواع الاكل وبرضه راضي.
واكيد وهم راكبين العربية وحواليهم الموكب الرئاسي كان بيحكي له قد ايه الشعب ده مسكين ومتبهدل في المواصلات العامة واكيد كان بيخليه يبص من الشباك علي الشعب وهو واقف مستني الموكب يعدي. واكيد وهم رايح يجتمع بالامريكان كان بيحكيله قد ايه الشعب ده مسكين وضحي كتير علشان يستقل ويشعر بالفخر ببلده وانه مستعد يموت ولا ان حد يتحكم فيه او في موارد بلده. يعني جمال مبارك ده من الآخر زي ابوه .... واحد مننا وحاسس بمشاكلنا وعاش في البلد دي طول عمره وبعدين اكيد هو لقط الصنعه من ابوه ... طبعاً مش ابن الوز عوام. فلننتخب جمال مبارك او لا ننتخبه ... هو الامثل وهو .... الرئيس القادم
Perfect..!!!!!
ردحذف