من واحنا صغيرين كانو بيعلمونا الدروس المستفادة في اخر كل قصة بالرغم من ان اللي درِسُلونا عمرهم ما فهموها ولا طبقوا الاسلوب ده في حياتهم وبم ان التغيير لازم يبدأ من المُطالِب بيه فأنا قررت اطلع الدروس المستفادة من انتخابات مجلس الشعب 2010 واللي بالمناسبة لا تختلف عن انتخابات 2005 وهاتعامل مع الانتخابات دي زي ما كنا بناخد عِبَر من معركة الاحزاب اللي كانت برضه من الكفار زي كتير من المعارك في الفترة دي.
اول دروس هو اضافة قانون لقوانين الطبيعة يعني الشمس بتشرق من الشرق والارض تدور حول الشمس والانسان يموت والحزب الوطني يحكم مصر.
ثاني درس هو ان الاسلام هو الحل ... ولكن يحتاج لمسلمين يطبقوه
ثالث درس هو ان للسلطة القضائية والقضاة كل الاحترام والتقدير ... بس ... مش اكتر من كدة
رابع درس هو ان ايام الانتخابات هي الفترة الوحيدة اللي الشعب بياخد فيها حقه من احترام وتحقيق رغبات وفلوس انما باقي الايام ... فبرضه بياخد فيها
خامس درس هو انه لا يوجد علاقة بين انتخابات مجلس الشعب .. واختيار نواب المجلس
سادس درس هو ان البرادعي عاش بره مصر وبالتالي لا يصلح ان يكون رئيس ... مش عارف ايه المناسبة بس هم بيقولوها كتير علشان نحفظها
سابع درس هو ان مصر اللي احنا عايشينها غير مصر اللي في الاعلانات .. يظهر احنا خدنا العنوان غلط او يمكن ان اللي سايق بينا هو اللي قالت عليه شادية "اصله معداش علي مصر"
ثامن درس هو ان تقريبا كدة .. مفيش فايدة في النظام
وطبعا علي غرار طريقة التعليم اللي اتعلمناه فاحنا لازم نحفظ الدروس المستفادة –معلش هي جملة متناقضة شوية يعني ازاي مستفادة واحنا حافظينها بس- علشان لو حد سألنا فيها نعرف نجاوبه ولو محدش سألنا ادينا طلعناها تتهوي شوية بدل ما تطولها رطوبة او تعفن جوانا ونبقي معفنين ... وانزل بتتر الحزب الوطني لمصلحتك للفنان لؤي
ليست هناك تعليقات:
إرسال تعليق