في مجتمعنا احنا متقسمين باكثر من تصنيف ومن التصنيفات دي ان في ناس بيتقال عليهم ولاد ناس ودول اللي اتولدوا في منطقة راقية ولما كبروا بابا جابلهم عربية ولما ميكنش معاهم فلوس بيضطروا آسفين انهم يتقابلوا في نادي الصيد علشان يوفروا. وتانيين بيتقال عليهم ولاد بلد ودول اللي اتولدوا في اماكن شعبية وبابا علمهم بالعافية ولما ميكنش معاهم فلوس مش بيقدروا يخرجوا من اوضتهم. احيانا بيضطر ولاد الناس انهم يعملوا نفسهم ولاد بلد علشان يعني يتقال عليهم عصاميين او علشان يكسبوا شريحة ولاد البلد بس نتيجة لجهلهم بحياة ولاد البلد فمش بيعرفوا يضحكوا عليهم. وعلشان كدة انا هأقدم دليل ولاد الناس لكي يصبحوا اولاد بلد.
الباب الاول : الاكل
لازم يكون شعبي واهمهم الفول والكشري بس اوعوا تفتكر ان الفول الشعبي ساندوتش فول وساندويتش طعمية وكوباية شاي ....و بكدة تبقي عملت كومبو شعبي لا واوعي تاكل ساندويتش طعمية بالمايونيز و فول من اللي هو بجنيه ونص في عيش شامي لان ولاد البلد عمرهم مايفكروا انهم يدفعوا 6 جنيه في فطار لفرد واحد وان الوجبة الصح هي كيس فول ب 75 قرش وب 50 قرش بدنجان علي فلفل والمخلل بيتاخد بالتناحة ورغيفين عيش من العيش البلدي ابو دقيق مدعم مش العيش الفرفور اللي معمول علشان يتمسك بيه الاكل.
اما عن الكشري فمينفعش تقول انك بتموت فيه بالهوت صوص بتاعته (الشطة) بحيث يكون سبايسي ويحرق اللسان ومينفعش تأكله من محلات من اللي الكمالة عندها ب 4 جنيه وبتنضف المحل بديتول وترش معطر جو علشان الناس متخرجش ريحة هدومها صلصة. الكشري الحقيقي بيتاكل في المحلات الشعبية اللي لما تطلب طبق ب 5 جنيه تلاقي كل اللي في المحل بيراعوك ويجيبولك مياه ساقعة ويمسحوا الترابيزة وانت ماشي ياخد صورة معاك. محلات الكشري الشعبية هي اللي لما تقعد عادي جدا انك تلاقي واحد ماتعرفوش قعد معاك علي الترابيزة ويفضل باصص لك في الاكل لحد ما طبقه ييجي ولو سايب حبه صلصة يقول لك عايز الصلصة دي يا كابتن. محلات الكشري الشعبية هي اللي اول حاجة تعملها لما يجيلك الطبق انك تشمه علشان لو حامض ماتكلوش ولما تاخد معلقة تلاقي في حاجات بتقرمش في حين ان كل مكونات الكشري هي عدس ومكرونة و رز. محلات الكشري الشعبية لما تخرج منها تفضل ريحتك صلصة لمدة اسبوعين وريحة بقك اسغفر الله العظيم من الدقة ام خل وثوم.
انتظروا الباب الثاني من دليل ولاد الناس لكي يصبحوا اولاد بلد
ههههههههه !!!
ردحذفالدليل ده جامد وااو. انت بجد هايل .. أنا نفسي بجد إني اكون مع أصحابي ولاد البلد. وأعمل زيهم كده واكول من عربية عمو بتاع الفول كده. يااي روعة
ردحذفيمممممممممممممممممممم ع الكشري
ردحذف