الوكيل : صباح الخير يا فندم
المدير : تعالي يا سيادة الوكيل في موضوع خطير لازم نتكلم فيه
الوكيل : أكيد حضرتك قصدك إنتخابات اتحاد الطلاب
المدير : بالضبط .. احنا لازم نشوف مين ينفع يكون رئيس إتحاد الطلاب
الوكيل (مندهشاً) : هو حضرتك مش المفروض رئيس الاتحاد بيختاره الطلاب ؟! هانعمل ايه؟ هانزور النتيجة ؟!
المدير (بغضب) : خد بالك من كلامك يا استاذ احنا مش مزورين .. احنا هانخلي الطلبة هم اللي يختاروا بنفسهم اللي احنا عايزينهم يختاروه
الوكيل : أه .. نتلاعب بيهم يعني
المدير : بالضبط
الوكيل : آسف يا فندم علي سوء الفهم
المدير : طيب فكر معايا كدة مين يبقي رئيس إتحاد .. ايه رأيك في الواد سيد بلاطة
الوكيل : نعممممممممم؟! ده واد معفن وضايع في الدراسة وفاشل .. ده حتي فشل إنه ينحرف
المدير : بس واحد زي ده مش هايقرفنا ويقعد يطلب في تغييرات في المدرسة
الوكيل : هو فعلاً مش هايطلب حاجة .. ده لو فهم أصلاً يعني ايه رئيس إتحاد .. بس إزاي واحد زي ده نخلي الطلبة تختاره
المدير : هو مين نازل الإنتخابات ؟
الوكيل : كريم حسن وده ولد متميز جداً ومن الاوائل و إبراهيم عبد العزيز وده برضه ولد متميز ومتفوق رياضياً ده بطل جمهورية في التنس .. وحضرتك عايز تنزل سيد بلاطة قدامهم ويكسب .. طب إزاي ؟!
المدير : إبراهيم عبد العزيز امره سهل .. هو اصلاً عيل تنك ونص كلامه العيال مش بتفهمه علشان كدة بيكرهوه غير إنه عايزنا نعمل في المدرسة ملعب تنس والعيال عندنا مش بتلعب غير كورة .. صحيح هم مالهومش فيها بس مابيفهموش غيرها
الوكيل : طب كريم حسن ؟ الواد قريب من العيال وكتير منهم بيحبوه علشان بيذاكر لهم وبيساعدهم في الامتحانات
المدير : تمام كدة .. احنا نسقط العيال اللي بيذاكر لهم ونخليه يجيب الدرجات النهائية ونقول إنه بيذاكر للعيال غلط علشان يفضل هو الأول
الوكيل : طب يا فندم حتي لو اقتنعوا بكل ده .. إزاي نقنعهم يختاروا سيد بلاطة .. ده واد معفن وبيتخانق معاهم كتير وفي كتير بيكرهوه
المدير : بس برضه في كتير بيحبوه
الوكيل : العيال الزبالة اللي زييه
المدير : ما هم دول كمان ليهم صوت .. بص احنا نجيب الواد ونحفظه كلمتين يقولهم للعيال .. زي إنه هايطلب من المدرسة تجديد ملعب الكورة وبيع الساندوتشات بسعر أرخص وتطويل مدة الفسحة ودي حاجات بسيطة مقدور عليها
الوكيل : وهم كد هايقتنعوا ؟ يعني لاهايجيب سيرة المكتبة ولا تجهيزات الفصول ولا الدكك ولا ضرب المدرسين ولا نظافة الحمامات ولا ميس فاطمة الاخصائية الاجتماعية اللي بتديهم إنجليزي والناس هاتختاره ؟ طب تيجي إزاي دي يا فندم ؟!
المدير : افهم بقي .. ركز علي إهتمامات العيال تكسبهم , وكيفهم يفضلوا في صفك والكام عيل اللي هايبصوا للحاجات اللي انت قلتها دي يروحوا ينتخبوا كريم ولا ابراهيم بس الاغلبية هايختاروا سيد بلاطة
اقرأ ايضاً
اقرأ ايضاً
ليست هناك تعليقات:
إرسال تعليق