الخلط هو الحل

لما تكون شخص فاسد والناس عرفت إنك فاسد وعايزين يحاسبوك بيكون قدامك حلول كتير لكن ثبت بالتجربة إن أكثرها فاعلية هو الخلط بين شخصك التافه الفاسد وبين ثوابت الناس اللي عايزين يحاسبوك. يعني لو انت لاعب كورة فاشل وخارب النادي والجمهور مبقاش طايقك خالص اربط بأي شكل بين وجودك في النادي وبين بقاء النادي في القمة , انشر إن اللعيبة اللي في النادي مرتبطين بيك نفسياً ولو سيبتهم هايتأثروا ويخسروا حتي من اضعف الفرق , أو ممكن تربط بين محاسبتك وبين نكران الجميل فمهما صدر منك انت برضه ابن النادي وأكد علي الجميع إن بطردك والاستغناء عنك الفرق التانية هاتقول علي النادي إنه قليل الأصل ومفيش أمان للبقاء فيه ومفيش لاعب هاييجي بعد كدة ويبقي مخلص لأنه عارف إن النادي ده مالوش أمان .. النتيجة هاتكون مذهلة بإن النادي هايضطر يبقي عليك أو في أسوأ الاحوال هايمنحك نهاية مشرفة لا تستحقها علي الإطلاق.

لو انت مدرس حقير بتكروت في الشرح علشان العيال تاخد عندك دروس وطلع ناس بتطالب برفدك تذكر قاعدة "الخلط هو الحل" واخلط بين بقاءك وبين العملية التعليمية , وإن لو تم طردك هايحصل عجز في المدرسين اكتر من اللي موجود بالرغم إن مفيش عجز اصلاً بس محدش هايراجع وراك , وطلع العيب علي الطلاب إنهم بييجوا المدرسة مش مركزين وأكد علي إنك اكتر المتضررين من الدروس لأنها بتهلكك وبتضيع صحتك بس مرغم عليها علشان مرتب الوزارة مش بيكفي .. والنتيجة برضه هاتكون مذهلة ببقاءك في منصبك وزيادة مرتبك وانت ولا هاتشرح للعيال بضمير ولا هاتبطل تدي دروس.

لو انت ضابط شرطة ابن **** والشعب طفح بيه الكيل وعايز يحاسبك وينتزع منك سلطاتك ويفرض رقابة عليك فلا تنسي قاعدة "الخلط هو الحل" واربط بين وجودك وبين الامن وإن انت الوحيد اللي يعرف مداخل ومخارج البلد وانت الوحيد اللي هايعرف يلم المجرمين لأن من الاساس انت اللي مسرحهم و اربط بين إصلاح الشرطة وفرض الرقابة عليها بإنهيارها وضياع البلد أمنياً ولو حد اقترح إدارة الداخلية بوزير مدني حك في الحتة بتاعة الخبرة والحس الامني لأنها بتاكل مع الشعب ولو حد جاب سيرة بلاد حصل فيها إصلاح للشرطة بدون حدوث إنفلات أمني استخدم الرد السياسي الاكثر إنتشاراً بإن احنا وضعنا وضع خاص .. والنتيجة هاتكون مذهلة بإن الوضع يبقي علي ما هو عليه يعني الشعب هايفضل في نفس الوضع وانت في نفس الوضع بعد ما كانوا علي وشك تبديل الاوضاع.

لو انت من تيار الاسلام السياسي وخدت قرار أو طلعت تصريح وطلع لك اللي يعارضك وينتقدك اوعي تقلق لأن انت في افضل المواقف واسهل طرف ينفذ قاعدة "الخلط هو الحل" لأنك تقدر تربط بين شخصك وبين الدين وإن نصرتك هي نصرة للدين ورفضك هو رفض للدين بالرغم إن الدين اللي انت بتتكلم عنه مسموح فيه بمراجعة القرارات السياسية بل والدينية كمان وده كان بيحصل مع الرسول شخصياً لكن طبعاً ماتجيبش سيرة عن الحاجات دي وركز علي إطاعة اولي الامر والعلماء ورثة الانبياء وبرضه محدش هايدور وراك .. والنتيجة هاتكون مذهلة بإنك هاتوصل للي انت عايزه وهايكون لك حصانة من نوع خاص وهايكون لك انصار يدافعوا عنك وينصروك حتي لو مايعرفوش اسمك.

أما لو انت مجلس عسكري وبقدرة قادر بقيت رئيس بيقود دولة بدل ما يقود جيش وطلع لك شوية عيال عايزين يراجعوا قراراتك ويحاسبوك علي البلاوي اللي عملتها فيهم فتذكر القاعدة الذهبية "الخلط هو الحل" وانشر بين الناس إن انت الجيش وأي حد بيرفضك يبقي بيرفض الجيش وكبر الموضوع بالتأكيد علي إنك انت الخط الاحمر اللي لو حد اتجرأ عليه الجيش هاينهار والاحتلال هايدخل البلد من كل حتة واقنع الناس بإن 19 نفر هم الجيش نفسه وأي حاجة وحشة هاتحصل لكم يبقي الجيش راح علي اساس إن الجيش مافيهوش رجالة غير ال 19 دول وماتقلقش محدش هاياخد باله إن آخر قائد للقوات المسلحة مرمي في السجن في تهمة قتل واموال عامة وإن ده مخربش الجيش بالعكس ده نضفه .. وبرضه النتيجة هاتكون مذهلة إن الشعب هايتقبل منك أي حاجة مهما كانت زبالة وهايشكرك دايماً علي الوقوف جنبه حتي لو عيشته في نفس المرار اللي كان عايشين فيه قبلك ومش بس كدة لأ ده كمان هايحوشوا عنك العيال اللي عايزين يحاسبوك وهايخبطوا في بعض وانت تستمر في منصبك معزز مبهدل الشعب ومطلع عين اللي جابوه.

خلاصة القول اربط الثابت بالمتغير عمر الناس ماهاتتغير