الجملة دي من اكتر الجمل المثيرة للإستفزاز والإشمئزاز وبرغم سخافتها إلا إنها بتتكرر كتير وعلي نطاق واسع بعد ما تم استخدامها لسنين طويلة في الكورة لما كان الواحد يقعد في بيتهم يقول المفروض حسن شحاتة يطلع ابو تريكة وينزل احمد حسن. وكنا برضه بنسمعها ايام مبارك لما كل واحد يبقي قاعد مكانه ويقول هم المفروض يعملوا مش عارف ايه علشان حال البلد ينصلح ومؤخراً الجملة دي بقت تتقال علي الشباب اللي شارك في الثورة بالصيغ الآتية :-
- المفروض الشباب يخرج من ميدان التحرير وينزل الشارع
- المفروض الشباب يجمع بعضه ويعمل تكتل واحد يعبر عن بالثورة
- الشباب عمل ثورة وساب غيره يجني ثمارها وكان المفروض يمنع ده
ومقابل التعليمات الرائعة واللي بالمناسبة صحيحة جداً بتظهر أسئلة منطقية
- من اول ما ظهر مصطلح ثورة شباب والناس غضبت وقالت لأ دي ثورة شعب يبقي ليه منتظرين الشباب هم اللي يعملوا كل حاجة والشعب اللي عمل ثورة مش بيقوم بأي دور لحماية الثورة اللي هو قام بيها؟
- الاخ اللي بيطلق التعليمات دي بدل ما يقعد يرغي ليه مايتحركش علشان ينفذ التعليمات ؟
كل اللي عمال يتكلم عن الشباب مش حاطط في دماغه إن الشباب دول محتاجين خبرة تشتغل معاهم واشخاص ثقة علشان الشارع ياخدهم محمل جد ويتقبلهم ؟! مش حاطط في دماغه إن التكتل الثوري هو مسؤولية العاملين في السياسة واللي فضلوا الانقسام علي التوحد ؟! مش حاطط في دماغه إن قدام كل عملية توحد في الف عملية تشرزم من اللي مش في مصلحتهم توحد القوي الثورية ومن الاحزاب اللي بتستقطب الشباب في الاتجاه المضاد للتوحد ؟! مش حاطط في دماغه إن الشباب دول لما بينفضوا نفسهم بيطلعوا قرشين يادوب يطبعوا بيهم يافطة ولا مجموعة ورق يعرف الناس بيهم في حين إن الاحزاب بتصرف آلاف بل ملايين علشان يوزعوا تهنئة بالعيد غير اللي عنده قنوات وجرايد وبيعمل مؤتمراته في افخم فنادق مصر ؟!
الخلاصة اللي عايز ينتقد ينتقد بس لازم يكون فعله سبق كلامه غير كدة فكلامه مجرد توثيق للسلبية واللي في حاجة مش عاجباه يتفضل يقوم يغيرها بنفسه وبلاش حد يعمل فيها مشرف ثورة من منازلهم واللي هاسمعه يقول بعد كدة "المفروض" هاقول له "وانت دورك ايه غير انك تقول المفروض ؟"
ليست هناك تعليقات:
إرسال تعليق