في حياتنا اليومية بنقرأ ونسمع كلام غريب مالوش اي معني وده بنسمعه من اهلنا في البيت ومن الناس في الشارع وكمان بيوصل لمذيعين في التليفزيون واوقات كتير من مسئولين في البلد بس دونا عن كل ده وعلشان منروحش في حديد انا هاتكلم عن الكلام الغريب اللي بيتقال في الميكروباص
بتبدأ الغرابة تخر من الراكب من قبل حتي ما يركب, لما تلاقي التباع (مساعد السواق) بينادي : هرم هرم هرم هرم هرم وخلاص زوره هايقع علي الارض من كتر الزعيق وتفاجأ بواحد بيشاور له و يسأله له : هرم ؟ يعني مبيفكرش ليه في نفسية الانسان اللي مضيع صحته في انه يأكد علي الناس انه رايح هرم ولا في نفسية الناس اللي ودنها اتفحتت من صوت التباع
جوة الميكرباص بقي مثلا لما تكون الاجرة نص جنيه وابعت الاجرة من خلال اللي قاعد قدامي فلما اديله النص جنيه يسألني : واحد ؟! ... يعني هو متخيل ان النص جنيه ده هايطرح ويرعرع ويبقي بقدرة قادر 5 جنيه ولا ده تمويه وباقي الفلوس هاتطلع بس لو ضغط علي. بس انا مؤخرا مبقتش اقدر امسك نفسي وساعات اغلس واقول : لو ينفع خلها 3 حضرتك
باقي الاجرة بيمثل لي وجع دماغ وحصل فعلا اننا كنا باعتين 5 جنيه وعايزين باقي نص جنيه والراجل اللي اخد مننا الفلوس سألنا : انتوا كدة عايزين نص جنيه قلت له اه (طبعا بالنيابة عن الناس اللي بعتت الاجرة) قال لي : طيب. وبص قدامه وبعت الفلوس للسواق وقال له احنا كدة عايزين ...... ورجع بص لي وقال لي انتوا عايزين نص جنيه قلت له اه قال للسواق احنا عايزين ...... اه نص جنيه المهم السواق بعت النص جنيه الراجل مسكه في ايده وفضل باصص ليه شوية وانا علي لساني اقول له ده نص جنيه عمله مصرية وتمثل خمسون قرشا وبعيداً عن كل ده فهو بتاعنا بس مقدرتش اقول كدة وبعد فترة من النظر والتأمل للنص جنيه بص لي وقال لي انتوا عايزين نص جنيه صح قام كل اللي قاعدين ردوا قالوا: ايوة عايزين نص جنيه قال: اتفضلوا
لما اكون بقي نازل وفي حد بيمثل عقبة في طريقي فبقول له بكل ادب : لو سمحت عديني يقوم رادد علي بسؤال مستفز ويقول : نازل ؟! يعني انا لو مش نازل هاطلب انه يعديني ليه بعمل اسعراض داخل الميكروباص ولا برقص رقصة الركاب يابابا علي الركاب وبرضه ساعات بغلس واقول : لا بس اصل الميكروباص حر قلت انزل اتهوي علي ما نوصل
ويستمر الهذيان ويبقي السؤال ليه الناس بتعمل كدة في بعض وليه مش مركزين في حياتهم ولا داريين باي حاجة وبيسألوا اسئلة ملهاش معني هل هم حاسسين بفراغ وبيحاولوا يملوه ولا عندهم رغبة في حرق دم الاخرين؟ انا مش قادر اوصل لاجابة
yabny matda2a2sh fel 7aya keda wa ella hatet3ab
ردحذف