مواطنون يلقون القمامة امام مبني الحي اعتراضا علي انتشار القمامة بالرغم من دفع رسوم النظافة
اول مرة سمعت فيها عن مصطلح نشطاء كانت من خلال فيلم تسجيلي عن اقليم دارفور وبعد كدة سمعته بيتقال علي الناس المناهضين للحروب الامريكية سواء علي افغانستان او العراق. لكن في مصر اطلق لفظ نشطاء علي الناس اللي بتطالب بحقوقها ... يعني ناس مصرية عايشة في مصر بتطالب بحقوقهم كمصريين فمش عارف ايه اللي خلي ناس بالصفات دي يتقال عليهم نشطاء !
هو الواحد لما يشارك في اختيار شكل السياسة اللي هو بيتحكم بيها أو يرفض قانون بيتطبق عليه او يعترض علي وجود اشخاص معينة في مناصب ادارية يبقي ده نسميه ناشط ؟! اظن إن المسمي الاكثر واقعية إنه مواطن غير مهمش مش بيدخل في المنظومة البيئية علي انه بيتاكل في كل الاحوال او يكون مجرد طبق مخلل عالسفرة ولا حبة مزة (بفتح الميم) يستمز بيهم واحد مخمور.
بس برضه من وجهة نظر تانية المسمي ممكن يكون معبر .. يعني احنا عندنا مواطن نشط سياسياً يبقي اكيد اللي عكسه مواطن خامل سياسياً .. وده ممكن نشبهه بالبطيخة .. فاللي بيكون خامل سياسياً بيبقي عامل زي البطيخة المحطوطة علي عربية كارّو وييجي السياسيين يقلبوا فيهم ويشقها علشان يشوفوها من جوة هاتبقي حمرا ولا قرعة ولو شافوا انهم مش هايستفيدوا بالبطيخة فبالتأكيد هايرموها وياخدوا غيرها والي تعجبهم هايخدوها علشان ياكلوها مع الجبنة (اللي هي بتكون مواطن تاني برضه)
لكن الناشط السياسي هو مواطن رفض انه يبقي بطيخة وقرر انه يعترض ويشارك في القرارات اللي بتمسه واللي بتنظم حياته وبنشاطه ده هو اللي بيحط السياسيين علي عربية البطيخ وهو ده الوضع الطبيعي إن المواطن صاحب الارض والجمهور هو اللي يختار حاكمه مش الحاكم هو اللي يختار شعبه ويصنفه كويس ووحش ومواطن صالح ولا مثير شغب وعميل ولا وطني وشريف ولا بلطجي.
طب في وجهة نظر تالتة بتقول إن الاعلام القذر هو اللي صنع اللقب ده وركز قوي علشان يربط بين الناشط السياسي والمظاهرات اللي بيحصل فيها مشاكل واللي بتزعزع استقرار البلد وبالتالي عقول الناس تتبرمج علي إنهم اول ما يسمعوا كلمة ناشط يربطوه بعدم الاستقرار والفوضي ويبقي المسمي جاهز في اي وقت في ايد الديكتاتور يطلقه علي كل اللي بيهاجمه واللي بيهاجمه بسلامة نية مش رافض اللقب لأنه واخده من وجهة نظر البطيخة والاسلوب ده في من ربط مسمي باحداث بيفكرني بمسمي منشورات واللي بيعتبرها اغلب الناس لحد دلوقتي تهمة فممكن نلاقي واحد بيقول للي جنبه في سره "ده معاه منشورات" وللاسف في شباب كتير مش واخد باله من فخ المسميات فبيصرح بسلامة نية انه "ناشط ومعاه منشورات"
يعني الخلاصة لما تطالب بحقك فانت كدة هاتبقي ناشط سياسي بالنسبة للناس البطيخ ومخرب بالنسبة للمسئول الفاسد وواحد عادي جداً وطبيعي بالنسبة للي بيطالب بحقه من سنين واتمني ييجي اليوم اللي اسمع في الاذاعة المدرسة في فقرة قل ولا تقل "قل انسان حر ولا تقل ناشط سياسي"
صدقت يا برنس.
ردحذفمتشكر يا ريس .. انا دخلت مدونتك .. عجبتني جداً .. استمر وانا استمر وربنا يديم نعمة الاستمرار علي عبيده
ردحذف